Àṣà Oòduà

Author: ayangalu

  • Àwọn ará ilú dáná sún èèyàn méjì tí wọ́n furasí bíi olè

    Àwọn ará ilú dáná sún èèyàn méjì tí wọ́n furasí bíi olè

    Ọjọ́ gbogbo n t’olè, ọjọ́ kan n tolóhun.
    Àwọn ènìyàn méjì kan ti wọ́n fura si gẹ́gẹ́ bi olè, ni wọ́n ti dáná sun nílùú Calabar, tíí ṣe olú ilú Cross River.

    Ìṣẹ̀lẹ̀ náà wáyé ní agbègbè Akai Effa, tíwọ́n sì fi tipá fún àwọn afurasí náà ní fóònù láti pe àwọn ẹbí wọ́n láti sọ fún wọ́n pé, wọ́n ti fẹ́ dána sun wọ́n nítorí àwọn jalè .

    Ìròyìn sọ pé, àwọn ará àdúgbò ọ̀hún pàmọ̀ pọ̀ láti dáná sún àwọ́n afurasí adigunjalè náà nítorí bí àwọn olè ṣe ń jà ládúgbò láti ìgbà díẹ̀ sẹ́yìn.

    Ní ọjọ́ ọdún Kérésìmesì, afurasí ọ̀daràn kan lẹ́yìn tó jalè tán, tún fipá bá ẹni tó kámọ́lé lòpọ̀ ní agbègbè Okoro Agbor ní Calabar.

    À mọ́ ó pàpà bọ́ sí ọwọ́ àwọn ará ìlú, wọ́n lùú, bó tilẹ̀ jẹ́ pé àwọn ọlọ́pàá gbìyànjú láti gbà á sílẹ̀ sùgbọ́n ẹmi ti bọ́ lára rẹ̀ kí wọ́n tó gbé e dé ilé ìwòsàn

    Alukoro ọlọ́pàá ìpínlẹ̀ Cross Rivers, DSP Irene Ugbo, fìdíi ọ̀rọ̀ náà múlẹ̀ pé lóòótọ́ ni ìṣẹ̀lẹ̀ náà wáyé, bí kò tilẹ̀ sọ ọ̀rọ̀ míràn kún àlàyé rẹ̀ mọ́.

    Fẹ́mi Akínṣọlá

  • Ẹgbẹ́ Shiites wọ́de l’Abuja, wọ́n jó Àsìá Amẹ́ríkà

    Ẹgbẹ́ Shiites wọ́de l’Abuja, wọ́n jó Àsìá Amẹ́ríkà

    Egbìnrìn ọ̀tẹ̀, bá a se n pàkan, nìkan ń rú
    Àwọ́n ọmọ ẹgbẹ́ “Islamic Movement of Naigeria” (IMN) tí gbogbo ènìyàn mọ sí Shi’ites lọ́jọ́ ajé ti ya sí ìgboro lágbègbè ilé ìtajà Bannex ni Wuse nílú Abuja láti wọ́de nítorí Olórí ọmọ ogun Iran Quasm Soleimani ti àwọn ọmọ ogun ilẹ̀ Amẹ́ríkà pa lọ́jọ́ Ẹtì tó kọjá.

    Bákan náà ni wọ́n pè fún ìtúsilẹ̀ adarí wọ́n Sheikh Ibraheem El-Zakzeky àti ìyàwó rẹ̀ Zeenat tí wọ́n wà ni àhámọ lọ́wọ́lọ́wọ́.

    Awọ́n olùfẹ̀hónú hàn náà bọ́ si ìgbòro Abuja tí wọ́n sì ń pariwo àwọn orin ọ̀tẹ̀ bí ” Iku ni fún Amẹ́ríkà”

    Bákan náà ni wọ́n dáná sun àsìá orílẹ́èdè Amẹ́ríkà tí wọ́n sì gbé àwọn àkọle tó bẹnu àtẹ lu pípa tí Amẹ́ríkà pa olóri ọmọogun Iran sọ́wọ́.

    Fẹ́mi Akínṣọlá

  • Ẹjẹ yóó sàn, bí Amẹ́ríkà ṣe pa olórí ọmọ ogun un wa – lran

    Ẹjẹ yóó sàn, bí Amẹ́ríkà ṣe pa olórí ọmọ ogun un wa..lran

    Kójú má ríbi , gbogbo ara lòògùn rẹ̀,bó ṣe jẹ́ pé, ó ń bọ̀ ,ó ń bọ̀ , gbogbo ara ní wọ́n mú tó o.
    À bí kí lọ̀rọ̀ ogun abẹ́lé kẹta “World War III”ṣe tan mọ́ ikú olórí ọmọ ogun Iran tó kú?
    Àwọn ènìyàn káàkiri àgbáyé ti ń sọ̀rọ̀ lórí bí àwọn ọmọ ogun Amẹ́ríkà ṣe pa Ọ̀gágun pàtàkì kan k’órílẹ̀èdè Iran, Qasem Soleiman.

    Òwúrọ̀ ọjọ́ Ẹtì ni ìròyìn jáde pé “Ààrẹ Amẹ́ríkà, Donald Trump ló pàṣẹ bí wọ́n ṣe ju àdó-olóró lù ú, 5098090550980905t ó sì mú ẹ̀mí rẹ̀ lọ.

    Ohun tí ọpọ ènìyàn ń sọ lórí Twitter ni pé pípa tí wọ́n pa Ọ̀gágun náà yóó fa ogun àgbáyé kẹta.

    Bí àwọn kan ṣe ń fi ọ̀rọ̀ náà ṣe nǹkan tó ń fẹ́ ìgbaradì àti amójútó tó yanrantí ni àwọn kan fi ń ṣe ẹ̀fẹ̀.

    Àwọn ọmọ ogun ilẹ̀ Amẹ́ríkà ti pa Ọ̀gágun Qasem Soleiman tó jẹ́ olórí ẹgbẹ́ ogun Quds ní Iraq.

    Olú iléeṣẹ́ ológun ilẹ̀ Amẹ́ríkà, “The Pentagon”, fìdí rẹ̀ múlẹ̀ pé àwọn pa á “nítorí àṣẹ tí àwọn gbà láti ọ̀dọ̀ Ààrẹ.”

    Inú ọkọ̀ ayọkẹlẹ kan tí wọ́n fi gbé Ọ̀gágun Soleiman ló wà ní pápákọ̀ òfurufú Baghdad, pẹ̀lú àwọn ọmọ ogun ajìjàgbara, lásìkò tí àdó olóró já lù ú láti òfurufú.

    Kò sì dín ní ènìyàn márùn tó ṣeéṣe kó kú lára àwọn tí wọ́n jọ ń lọ.
    Olórí tó ga jù lọ ní orílẹ̀èdè Iran, Ayatollah Ali Khamenei ti sọ pé “ìjìyà ńlá ń dúró de àwọn ọ̀daràn tó wà nídìí ìṣẹ̀lẹ̀ náà”.

    Bákan náà ló tún kéde ọjọ́ mẹ́ta láti sẹ ọ̀fọ̀ àwọn tó kú.

    Ọ̀kan pàtàkì ni Ọ̀gágun Soleiman nínú Ìjọba tó wà l’óde ní Iran, Ayatollah Ali Khamenei sì ni ikọ ajijagbara rẹ, Quds, n jábọ fun.

    Ṣùgbọ́n, ilẹ̀ Amẹ́ríkà ti kéde Ọ̀gágun náà, àti ikọ ajijagbara Quds, gẹgẹ bi agbesunmọmi, to si tun sọ pe wọn mọ si bi ogunlọgọ awọn ọmọ ogun ilẹ Amẹrika ṣe ku.

    Ìkéde kan sọ pé àwọn pa Ọ̀gágun Soleiman láti dáàbò bo àwọn ọmọ ogun Amẹ́ríkà tó wà nílẹ̀ òkèèrè.

    Èyí wáyé lẹ́yìn ọjọ́ díẹ̀ tí àwọn kan tó fi ẹ̀hónú hàn kọlu iléeṣẹ́ Ìjọba Amẹ́ríkà ní Baghdad, tí àwọn àti àwọn ọmọ ogun Amẹ́ríkà sì kọlu ara wọn níbẹ̀.

    Olú iléeṣẹ́ ológun Amẹ́ríkà sọ pé Ọ̀gágun Soleiman fọwọ́ sí bí wọ́n ṣe kọlu iléeṣẹ́ Amẹ́ríkà.

    Ní kété tí Ìròyìn ikú Soleiman jáde, ni Ààrẹ Amẹ́ríkà, Donald Trump fi àwòrán àṣìá Amẹ́ríkà s’órí Twitter.

    Femi Akínṣọlá

    Iroyinowuro

  • È̩ ń fi ẹ̀wọ̀n run imú ẹ̀yin Olóyè Ìbàdàn mọ́kànlélógún tẹ ń ǹ pera a yín lọ́ba

    Ọrọ̀ kò tíì tán lórí àwọn Olóyè mọ́kànlélógún tí Ilé ẹjọ́ sọ pé kí wọ́n lọ rọọ́kún nílé nílùú Ìbàdàn.

    Kọmíṣọ́nnà ètò ìdájọ́ tẹ́lẹ̀rí nípìńlẹ̀ Oyo, Ọ̀gbẹ́ni Michael Lànà ló ṣe ìkìlọ̀ fún wọn pé, kí wọ́n yé pe ara wọn ní ọba káàkiri, bí bẹ́ẹ̀kọ́, wọ́n ń fi ẹ̀wọ̀n run imú ni.

    Nínú àtẹ̀jáde kan tí Ọ̀gbẹ́ni Lànà fi síta lọ́jọ́ Ajé, ó sọ wí pé bí àwọn Olóyè náà tí ń pe ara wọn, tí wọ́n sì ń gbé ara wọn gẹ̀gẹ̀ bi ọbí lòdì sí àṣẹ ilé ẹjọ́.

    ”Ìgbésẹ̀ ìjọba àná nípìńlẹ̀ Ọyọ tó fún àwọn Olóyè mọ́kànlélógún láti máa dé adé ìlẹ̀kẹ̀, àti láti máa pe ara wọn ní Ọba lòdì sí òfin,” Ọ̀gbẹ́ni Lànà ló wòye bẹ́ẹ̀

    Ó ṣàlàyé síwájú síi pé ìdájọ́ Ilé ẹjọ́ gíga ìpínlẹ̀ Ọ̀yọ́ tó wáyé lọ́jọ́ kọkàndínlógún oṣù Kọkànlá ọdún 2019 ti gbé ìgbésẹ̀ ìjọba àná lórí àwọn Olóyè Ìbàdàn sẹ́ẹ̀gbẹ́ kan.

    Ọ̀gbẹ́ni Lànà ṣọ pé ìyàlẹ́nu ló jẹ́ pé àwọn kan sì tún ń wọ adé ìlẹ̀kẹ̀ tí wọ́n sì ń pe ara wọn ní Ọba ìlú Ìbàdàn.

    Ó ní Ìjọba kò ní bèṣùbẹ̀gbà láti gbé ìgbésẹ̀ lórí bí àwọn Olóyè mọ́kànlélógún náà ṣe ń pe ara wọn ní Ọba káàkiri.

    Ọ̀gbẹ́ni Lànà wá ké pe Kọmíṣọ́nnà ọlọ́pàá ìpínlẹ Ọyọ pé kó pàṣẹ fáwọn agbófinró láti fi ọwọ́ òfin mú ẹnikẹ́ni nínú àwọn Olóyè náà tó bá ń pe ara rẹ̀ lọ́ba.

    Fẹ́mi Akínṣọlá

    http://iroyinowuro.com.ng/2020/01/02/e%cc%a9-n-fi-ewon-run-imu-eyin-oloye-ibadan-mokanlelogun-te-n-%c7%b9-pera-a-yin-loba/

  • Àmọ̀tẹ́kùn: Ẹ̀ṣọ́ ilẹ̀ Oòduà (Yorùbá) ‘Àmọ̀tẹ́kùn’ ṣetán láti bẹ̀rẹ̀ iṣẹ́ káàkiri ilẹ̀ káàárọ̀ o ò jíire

    Ẹ̀ṣọ́ ilẹ̀ Oòduà (Yorùbá) ‘Àmọ̀tẹ́kùn’ ṣetán láti bẹ̀rẹ̀ iṣẹ́ káàkiri ilẹ̀ káàárọ̀ o ò jíire.

    Àmọ̀tẹ́kùn
    Àmọ̀tẹ́kùn

    Ọ̀rọ̀ ti di olójú ò níí yajú ẹ̀ sílẹ̀ kí tàlùbọ̀ ó yíwọ̀ọ́ àti pé ọmọ onílùú kò níí fẹ́ ó tú lọ̀rọ̀ dà báyìí ó, bí.
    Gómìnà ìpínlẹ̀ Èkìtì, Kayode Fayemi ti kéde pé gbogbo ètò ti tò báyìí fún Ilé iṣẹ́ ètò ààbò ilẹ̀ Oòduà (Yorùbá) ”Àmọ̀tẹ́kùn”” láti bẹ̀rẹ̀.

    Fayemi ní ọjọ́ kẹsàn án, oṣù kínní, ọdún 2020 ni ètò náà táwọn gómìnà mẹ́fà apá gúúsù orílẹ̀-èdè- Nàìjíríà ìwọ̀ oòrùn ṣe àgbékalẹ̀ rẹ̀ yóó bẹ̀rẹ̀ káàkiri ilẹ̀ Oòduà (Yorùbá).

    Àmọ̀tẹ́kùn

    Gómìnà Fayemi fi ọ̀rọ̀ ọ̀hún léde nínú ọ̀rọ̀ ọdún tuntun tó báwọn èèyàn ìpínlẹ̀ Èkìtì sọ L’ọ́jọ́rù, ọjọ́ kínní, oṣù kínní, ọdún 2020.
    Fayemi ṣàlàyé pé àwọn ẹ̀ṣọ́ ‘Àmọ̀tẹ́kùn”’ yóó máa ṣe ìrànwọ́ fún àwọn agbófinró ní gbogbo ìpínlẹ̀ mẹ́fà nílẹ̀ Oòduà (Yorùbá).

    Gómìnà Èkìtì ní Ìjọba ti setán láti ríi pé ètò ààbò gbópọn síi nílẹ̀ Oòduà (Yorùbá).

    Ó ní lóòtọ́ọ́ ni pé ìwà ọ̀daràn kò le tán nílẹ̀ pátápátá, à mọ́ àwọn gómìnà mẹ́fẹ̀ẹ̀fà ti fẹnu kò láti ríi pé ìwà ọ̀daràn dínkù káàkiri ilẹ̀ káàárọ̀ o jíire.

    Àmọ̀tẹ́kùn
    Àmọ̀tẹ́kùn

    Ẹ̀wẹ̀, ẹgbẹ́ OPC àtàwọn ẹgbẹ́ ajìjàgbara míì nílẹ̀ Oòduà (Yorùbá) ti ké pe àwọn gómìnà yìí tẹ́lẹ̀ pé kí wọ́n fáwọn láṣẹ láti ṣiṣẹ́ pọ̀ pẹ̀lú àwọn agbófinró láti gbógun ti àwọn jàǹdùkú tó ń dá rògbòdìyàn sílẹ̀ nílẹ̀ Oòduà (Yorùbá).

    Fẹ́mi Akínṣọlá

  • Naira Marley ń rìn ní bèbè ẹ̀wọ̀n lọ́dún 2020 bí kò bá fara hàn lórí ẹ̀sùn ìjọ́kọ̀gbé – Ilé ẹjọ́

    Naira Marley ń rìn ní bèbè ẹ̀wọ̀n lọ́dún 2020 bí kò bá fara hàn lórí ẹ̀sùn ìjọ́kọ̀gbé…..Ilé ẹjọ́

    Àdúrà ká má rẹ́jọ́ loníkálukú ń gbà,kí èṣù ó sì má yá wa lò.Ṣùgbọ́n bí nǹkan ṣe ń lọ yìí fún Naira Marley, gbajúgbajà olórin tàkasúféè tí ìràwọ̀ rẹ̀ ń tàn lọ́wọ́ báyìí , àfàìmọ̀ kí ó má bẹ̀rẹ̀ ọdún 2020 pẹ̀lú ẹ̀wọ̀n.

    Ilé ẹjọ́ Májísírètì àgbà kan lágbègbè Tinubu nípìńlẹ̀ Èkó ló pàṣẹ pé bí Naira Marley tí orúkọ àbísọ rẹ̀ ń jẹ́ Azeez Fashọla, kò bá fi ara hàn níwájú kóòtù náà ní ọjọ́ kẹrìnlá oṣù kínní ọdún 2020, ẹ̀wọ̀n ló fi ń ṣeré.

    Naira Marley ń jẹ́jọ́ ìjọ́kọ̀gbé níwájú Adájọ́ májísírètì Tajudeen Elias pẹ̀lú àwọn mọ̀lẹ́bí rẹ̀, Idris Fashola, babatunde Fashola àti Kunle Obere.

    Adájọ́ náà kìlọ̀ fún gbajúgbajà olórin náà láti fara hàn ní ọjọ́ náà , bí bẹ́ẹ̀ kọ́, àṣẹ ẹ lọ gbé e wá ní wíwọ́ ní dídè (Bench warrant) lòun yóó pa fáwọn agbófinró lórí rẹ̀.

    Ní ọjọ́ Ìṣẹ́gun ni ilé ẹjọ́ pàṣẹ náà níbi ìtẹ̀síwájú ìgbẹ́jọ́ ẹ̀sùn jíjí ọkọ̀ gbé tí wọ́n fi kàn án.

    Ní ọjọ́ kẹrìndínlógún oṣù kejìlá ọdún 2019 ni wọ́n kọ́kọ́ gbé wọn lọ síwájú Ilé ẹjọ́ náà, ṣùgbọ́n Naira Marley kò yọjú sílé ẹjọ́.

    Ní ọjọ́ náà, àwọn afurasí mẹ́ta tókù ní àwọn kò jẹ̀bi ọ̀rọ̀ ẹ̀sùn náà.

    Fẹ́mi Akínṣọlá

  • Ohun t’ọ́kùnrin ń ṣe l’Ekiti, obìnrin lè ṣe é. Àjọ̀dún Àṣà ìbílẹ̀ lékìtì

    Ohun t’ọ́kùnrin ń ṣe l’Ekiti, obìnrin lè ṣe é.. Àjọ̀dún Àṣà ìbílẹ̀ lékìtì

    Fẹ́mi Akínṣọlá

    Àṣà àti ìṣe wà nínú n tíí ṣàfíhàn èèyàn bí ọmọ ọkọ tàbí ọmọ ìdàkejì n ló díá fún bí onírúurú ohun tẹ́ ẹ̀ tilẹ̀ mọ pé ó wà láyé yìí se dohun àfojúrí níbi ayẹyẹ àjọ̀dún àṣà ọdún yìí ní ipinlẹ Èkìtì, .

    Adarí iléeṣẹ́ Àṣà ni ìpínlẹ̀ Èkìtì, Wale Ojo sọ fún akọ̀ròyìn pé àwọn ń kó àwọn àṣà àwọn jáde láti ṣe àfihàn rẹ̀ fáráyè ni.

    “A sọ ijó di owó, ohun t’ọ́kùnrin ń ṣe l’Èkìtì, obìnrin lè ṣe é”. Ọ̀gbẹ́ni Wale sọ pé Èkìtì Festival ti mú ọlá àti oríire wọ ìlú Èkìtì, “ó ń gbe ọgbọ́n inú àti ìmọ̀ àwọn ọ̀dọ́ jáde síta”.

    Ó tẹ̀síwájú pé gbogbo ìlú tó wà ní Africa ló kù tí Èkìtì máa fìwé pè lọ́dún 2020 láti wá wo ọgbọ́n, ìmọ̀ àti òye ti Ọlọ́run fi sọlọ̀ sí ìlú Èkìtì.

    Lóòtọ́ lóòtọ́, kò sí àṣàdànù nínú àwọ́n afihan ohun agbaṣa ga to waye nibi EKiti Festival 2019.

    Ṣé ẹ mọ̀ pé Ekiti ni ìlú tí Ògún Lákááyé wọlẹ̀ sí?
    Ìlú Ọrúnmìlà náà, Èkìtì ni.

    Èṣù tó má a ń dá àbò bo àwọn èèyàn tirẹ̀, Èṣù Ẹlẹ́gbára tó máa ń gba àwọn eeyan lọ́jọ́ ibi bá dé, ìlú Ekiti ni gbogbo wọn ti wá gẹ́gẹ́ bí adarí àṣà ìpínlẹ̀ náà ṣe sọ ọ́.

    Ìyàwó gómìnà ìpínlẹ̀ Ekiti, Erelú Bísí Fáyemí kádíì ètò àjọ̀dún náà pẹ̀lú ọ̀rọ̀ ìwúrí nípa Ekiti pé “Orin Ekiti dá yàtọ̀, ijó wọn, òkè ńlá ńlá àtàwọn nǹkan tó jẹ́ pé owó làwọn èèyàn fi lọ ń wò wọ́n níbòmíràn”.

    Iroyinowuro

  • Mu pàrágá wakọ̀ l’Ọyọ, kóo kó sí páńpé̩ ìjọba

    Mu pàrágá wakọ̀ l’Ọyọ, kóo kó sí gbaga ìjọba

    Fẹ́mi Akínṣọlá

    Omi tuntun ti rú, ẹja tuntun ti wọ ọ ní ìpínlẹ̀ Ọ̀yọ́. Awakọ̀ mẹẹdọgbọn ni ọwọ́ òfin ti tẹ̀ nìpínlẹ̀ náà lórí ẹ̀sùn pé wọ́n ń mutÍ nígbà tí wọ́n tún ń wa ọkọ̀.

    Kọmíṣọ́nnà fún ètò Ìròyìn nípìńlẹ̀ náà, Wasiu Olatubosun tó bá akọ̀ròyìn sọ̀rọ̀ ṣàlàye pé ìgbésẹ̀ yìí yóó jẹ́ ẹ̀kọ́ fáwọn awakọ̀ míì tí wọ́n bá tún fẹ́ hu irú ìwà bẹ́ẹ̀ .

    Lópin ọ̀sẹ̀ tó lọ ni àjọ tó ń rí sí ìdarí ọkọ̀ ní ìpínlẹ̀ Ọ̀yọ́, OYRTMA mú àwọn awakọ̀ náà pẹ̀lú ìrànlọ́wọ́ ẹ̀rọ ìgbàlódé tó le ṣàfíhàn bí èèyàn bá mu ọtí.
    Kọmíṣọ́nnà Olatubọsun sọ pé gbogbo àwọn awakọ̀ mẹ́ẹ̀dọ́ọ́gbọ̀n náà ni yóó fojú ba Ilé ẹjọ́.

    Kọmíṣọ́nnà ní Ilé ẹjọ́ ni yóó sọ pàtó ìjìyà tó tọ́ sí wọn.

    Ọ̀gbẹ́ni Olatubosun tún fi kún ọ̀rọ̀ rẹ̀ pé mímú àwọn awakọ̀ tó ń mu ọtí kìí ṣe nínú àsìkò pọ̀pọ̀sìnsìn ọdún nìkan.

    Kọmíṣọ́nnà fún ètò Ìròyìn nípìńlẹ̀ Ọyọ ní ètò náà yóó tẹ̀síwájú nínú ọdún 2020 nítorí ẹ̀mí àwọn èèyàn ìpínlẹ náà jẹ ìjọba Gómìnà Ṣèyí Mákindé lógún.

    Ẹ̀wẹ̀, Álága OYRTMA, Dókítà Akin Fagbemi ṣàlàyé pé ìgbésẹ̀ àjọ wọn láti mú àwọn ọmuti awakọ̀ wa ni ibamu pẹlu iṣẹ ajọ naa lati dẹkun ijamba ọkọ tawọn ọ̀mùtí awakọ̀ ń ṣe ṣokùnfà rẹ̀ nípìńlẹ̀ O Ọyọ.
    Ó fi kún ọ̀rọ̀ rẹ̀ pé ní òpópónà Ring-Road, Iwo-Road, àti Mọ́níyà sí Ogbomoṣo ni ti múwọn àwọn awakọ̀ ọ̀hún.

    http://iroyinowuro.com.ng/2019/12/31/mu-paraga-wako-loyo-koo-ko-si-panpe%cc%a9-ijoba/

  • Odù kan gorí àtẹ,Ọdẹ́gbèmí Ọdẹ́gbolá11 goróyè Àràbà nílẹ̀ẹ̀bàdàn

    Odù kan gorí àtẹ,Ọdẹ́gbèmí Ọdẹ́gbolá11 goróyè Àràbà nílẹ̀ẹ̀bàdàn

    Fẹ́mi Akínṣọlá

    Erin wo! Àràbà Awo ilẹ̀ Ìbàdàn, Ògbó Awo Oyewusi Amọo Fakayode wọ káàl’ẹ̀ sùn.Ọjọ́ a kú là á dère,èèyàn ò sunwọ̀n láàyè. Bí àlá ló ń ṣe ọ̀pọ̀lọpọ̀ àwọn ẹni ọ̀rọ̀ kàn nílànà ìṣẹ̀ṣe nígbà tí wọ́n gbọ pé àgbà awo náà tí jawàá lẹ̀.
    Ògbó awo Oyewusi ni Àràbà kẹrìnlélógún nínú ìtàn oyè gbogbo gbòò fún onísẹ̀ṣe nílẹ̀ẹ̀bàdàn.
    Àràbà tí ó gbésẹ̀ yìí,gorí oyè ní ọdún 2013,nígbà tó fàdàgbá ayé rọ̀ ní ọjọ́kejìdínlọ́gbọ̀n oṣù kejìlá ọdún 2019.

    Nínú ọkàn ò jọ̀kan ọ̀rọ̀ tí wọ́n fí ń ròyìn Àgbà awo náà, wọ́n fìwà rere, tíí ṣe ẹ̀sọ́ ọmọnìyàn ròyìn Ògbó awo Oyewusi Amọo nínú ìṣe rẹ̀ ní dúníyàn.
    Olóyè náà ní wọ́n ní kò fẹ́ ìrẹ́jẹ fún ẹnikẹ́ni, kìí sì gbè sẹ́yìn àbòsí, bẹ́ẹ̀ ló kórìíra tẹ̀ǹbẹ̀lẹ̀kun.
    Àgbà awo Fakayode wá ìrẹ́pọ̀ tó gbọngbọ́n láàrin àwọn ìpẹ́ẹ̀rẹ́ àti Ògbó awo nílẹ̀ẹ̀bàdàn àti àwọn ìlú mìíràn tó yíiká, èyí náà ló sì jẹ́ ó rọrùn tí ìdàgbàsókè fi bá ẹgbẹ́ onísẹ̀ṣe lásìkò o tiẹ̀ .
    Ṣé orí tí yóó dádé,inú agogo idẹ ní tií wà, ọrùn tí yóó lèjígbà ìlẹ̀kẹ̀,inú agogo idẹ ní tií wá, ìbàdì tí yóó lo Mọ́sàajì,aṣọ ọba tíí taná yanran yanran inú agogo idẹ náà ní tií wá.

    Bí Àràbà se gbésẹ̀ yìí, àwọn ìgbìmọ onísẹ̀ṣe lápapọ̀ kò fẹ́ kí ìyapa ẹnu wà. Gẹ́gẹ́ bí Ìlànà oyè jíjẹ́ nílẹ̀ẹ̀bàdàn, bí Olóyè kán bá ti gbésẹ̀, kò sí àríyànjiyàn ẹni tó tọ́ tó yẹ ní Ìlànà oyè náà ní yóó gorí àpèrè.
    Ní báyìí, akọ́dá awo tíí ṣe igbákejì Àràbà àná,ni àwọn tèwe tàgbà tí gbárùkù tì fún ìtẹ̀síwájú gbogbo onísẹ̀ṣe lápapọ̀.

    Nígbà tí ìròyìn Òwúrọ̀ pé àgbà awo naa lórí ẹ̀rọ ìbánisọ̀rọ̀ rẹ̀ ,o jẹ́ ó di mímọ̀ pé ní ìgbẹ́sẹ̀ oyè nílẹ̀ẹ̀bàdàn,ohun gbogbo pẹ̀lú ètò ni , bẹ́ẹ̀ ni kò dàrú rárá.
    Ó ní Ìlọsíwájú bá onísẹ̀ṣe nípa pé wọ́n rí ìjọba ìpínlẹ bá sọ̀rọ̀ pẹ̀lú akitiyan Àràbà àná yìí tí o sí di pé wọ́n bèèrè fún
    ìsinmi enu ise ọba “Ìṣẹ̀ṣe day August 20, ọdọọdún.”À mọ̀ Gómìnà àná Abiọla Ajimobi kò fi ọwọ́ sí i,bi o tilẹ̀ jẹ́ pé Ilé ìgbìmọ̀ aṣòfin ìpínlẹ̀ oyo fi ọwọ́ síi nígbà náà.

    Ó ṣọ síwájú pé iṣu atẹnumọ́rọ̀ kìí jóná ní àwọn yóó fi ọ̀rọ̀ náà ṣe, òun sì gbà pé Olódùmarè yóó kàwọn yẹ,níwájú Gómìnà ìpínlẹ̀ Ọ̀yọ́ Onímọ̀ ẹ̀rọ Ṣèyí Mákindé torí pé òun ní àfojúsùn rere fún ìtẹ̀síwájú ìlú àti pé, àfojúsùn rere ní awo mímọ́ gbọdọ̀ ní,ojú òpó náà sì ni òun wà torí pé ọmọ àtàtà kìí borúkọ ẹbí jẹ́,ati pé èèyàn tó bá tí lórúkọ rere,kii wá àlàjẹ́ burúkú kún un.
    Akọ́dá,Àgbàawo,Oloye Ifalere Ọdẹ́gbèmí Ọdẹ́gbolá11 ni Àràbà Ìbàdàn karùndínlọ́gbọ̀n (25). Òun tún fẹ́ẹ́ ẹ̀ ni Àràbà tó kéré jùlọ lọ́jọ́ orí tí ó fi dé ipò yí .

    A bíi ní ọjọ́ kẹfà , oṣù kẹfà ọdún 1960. Ó bẹ̀rẹ̀ àkàsọ̀ oyè awo lọ́dún 1992, ó sì sún kẹ̀rẹ̀ kẹ̀rẹ̀ láti ọdún náà kí ó tó di Àràbà ní ọjọ́kejìdínlọ́gbọ̀n oṣù Kọkànlá ọdún 2019.Èyí fihàn pé ìrìn àjò náà gbà á ní ọdún mẹ́tàdínlọ́gbọ̀n kó tó goróyè.
    Ìgbà yí ló sì di ọgbọ̀n ọdún àti oṣù mẹ́wàá tí bàbá a rẹ̀, Àgbà Oyè Ọdẹ́wùmì Àlàó Ọdẹ́gbolá1 fi ipò náà sílẹ̀ .

    Bẹ́ẹ̀ Àràbà mẹ́ta lẹ́yìn ikú Ọdẹ́gbolá akọ́kọ́ ti jẹ ,kí ó tó padà kan Ọdẹ́gbọ́lá kejì.(11) .
    Ìròyìn Òwúrọ̀ kí Àràbà awo náà pé àṣeyè ní àdáwọ́lé wọn gbogbo yóó jẹ́ ó.

    iroyinowuro

  • Ìjọ Ọ̀rúnmìlà Ifákáyéjọ afi òtítọ́ ayé hàn

    Àwa ni ìmọ́lẹ̀ fún gbogbo Ìjọ mímọ́ Ọ̀rúnmìlà ní gbogbo àgbáyé nítorí ọ̀rọ̀ Ọlọ́run tí àńpè ní Ifá ni a fín to Ìjọ tiwa

    Ifá(ọ̀rọ̀ Ọlọ́run)ni afi kó ayé jọ
    Ọ̀rúnmìlà(aṣíwájú rere)ní abá ni táyése

    Ẹ wá bá ọ̀rọ̀ ẹnu Ọlọ́run tí àńpè ní Ifá pàdé nínú ìjọ wa, kí ìtumọ̀ sí bá ìgbésí ayé rẹ lọ́dún titun

    Awóyemí Ọlọ́run wà 1
    Ṣókinlójú arẹ̀mọ ẹ̀dú
    Aníkin ajé níkùn 1
    Small but mighty
    CEO Gbasky bitter

    Mo sé ní ìwúre sí Ọlọ́run fún orí kọ̀ọ̀kan wa lókùnrin lóbìnrin lọ́mọdé àti àgbàlagbà wípé gbogbo oun tó sokùnkùn nínú ayé wa,pẹ̀lú àṣẹ Olódùmarè ìmọ́lẹ̀ yóò tàn nínú ọdún titun,okùnkùn yóò sì wábigbà