Ààrẹ Buhari dijú lé Ọ̀gá Àjọ NECO àti àwọn mẹ́rin mìíràn tó jàjẹbánu
Ààrẹ orílẹ̀-èdè Nàìjíríà, Muhammadu Buhari ti fi ọwọ́ òṣì júwe ilé fún adarí àjọ elétò ìdánwò àṣekágbá ti girama, NECO àti àwọn mẹ́rin mìíràn lórí ẹ̀sùn pé wọ́n ṣe màgòmágó.
Nínú àtẹjáde tí Ààrẹ Buhari fi léde ló ti ní Ọjọ́gbọn Charles Uwakwe, Bamidele Olure, Shina Adetona, Tayo Odukoya àti Babatunde Aina ni wọ́n ti kọkọ fún ní ìwé lọ gbélé rẹ fún ìgbà díẹ̀ kí wọ́n fi ṣe ìwádìí fínífíní ẹ̀sùn ìwà àjẹbánu tí wọ́n fi kàn wọ́n.
Wọ́n ní Uwakwe jẹ̀bi ẹ̀sùn lílo owó àjọ náà básubàsu gẹ́gẹ́ bí òfin àjọ náà ti ọdún 2007 sẹ tako ìwà àjẹbánu bẹ́ẹ̀. Ààrẹ wá késí i láti dá gbogbo ẹrù Ìjọba tó wà ní ọwọ́ rẹ̀ padà fún adelé darí àjọ náà tó wà níbẹ̀ lọ́wọ́lọ́wọ́.
Bákan náà nínú àtẹjáde ọ̀hún ni wọ́n sọ pé Arákùnrin Bamidele Olure tó jẹ́ adarí ẹ̀ka ìṣúná ní àjọ NECO ló jẹ̀bi ẹ̀sùn ṣíṣe owó àjọ náà tó wà ní ìkáwọ́ rẹ básubàsu, tí kò sì yẹ ní adarí ẹ̀ka náà mọ́.
Ọ̀mọ̀wé Dókítà, Shina Adetona ni wọ́n fẹsun kàn ní tirẹ̀ pé ó ṣe jibiti, tó sì ṣe màgòmágó pẹ̀lú àkọsílẹ̀ àwọn òṣìṣẹ́.
Tayo Odukoya ní wọ́n lé nítorí òun náà ṣẹ màgòmágó tó tako òfin àjọ náà, nígbà tí wọ́n sì lé agbẹjọ́rò Babatunde Aina nítorí ó yí àkọsílẹ̀ ‘pàdé, tí ó sì ṣe màgòmágó nípa títa ilé ìgbé àjọ náà. Bákan náà ni Mínísítà fún ètò ẹ̀kọ́, Mallam Adamu Adamu wá pàṣẹ fún àwọn adarí àjọ náà láti bẹ̀rẹ̀ ìgbésẹ̀ láti gba gbogbo owó tí wọ́n fi ọ̀nà èrú gbà padà lọ́wọ́ wọn.
Tí a kò bá gbàgbé, Ọjọ́ Kẹwàá, Oṣù Karùn ún ọdún 2018 ni Ìjọba kọ ìwé lọ gbé ilé rẹ fún ìgbà díẹ̀ sí Ọ̀jọ̀gbọ́n Uwakwe fún ìwádìí ẹ̀sùn jẹgúdújẹrá tí wọ́n fi kàn án àti àwọn meji míràn.
A kìí gbélé ẹni ká fi ọrùn rọ́ ni a ti ń gbọ́ tipẹ́ tipẹ́, sùgbọ́n kín wá ni ká ti pe tirúfẹ́ ìṣẹ̀lẹ̀ ajániláyà yìí tó wáyé ní ààfin Ọọ̀nirìṣà Ọba Adéyẹyè Ògúnwùsì,ní alẹ́ ọjọ́ Ìṣẹ́gun níbi tí àwọn èèyàn ìlú Ilé Ifẹ̀ ni àwọn ti ń gbọ́ ìró ìbọn ní kíkàn kíkan ní ilé Oòduà tíí ṣe ààfin Ọọ̀nirìṣà Ilé Ifẹ̀, Ọba Adéyẹyè Ògúnwùsì .
Eléyìí ló ṣì mú kí ọ̀pọ̀lọpọ̀ àwọn èèyàn ìlú ìṣèǹbáyé náà ó máa kó àyà sókè lórí àlàáfíà Ọọ̀nirìṣà Adéyẹyè Ògúnwùsì.
Nígbà tí gbogbo rẹ̀ yóó fi rọlẹ̀ ni ìròyìn jáde pé àwọn èèyàn mẹ́ta kan gbìyànjú láti fi ipá wọ ààfin nínú ọkọ̀ ayọ́kẹ́lẹ́ kan. Nígbà tí wọ́n dé ìloro àkọ́kọ́ ní ààfin Ọọ̀nirìṣà ní àwọn ẹ̀ṣọ́ bèèrè ohun tí wọ́n wá ṣe, tí méjì nínú wọn sì bẹ́ sílẹ̀ nínú mọ́tò tí wọ́n sì fi ẹsẹ̀ fẹ́ ẹ.
Ẹnì kẹta wọn tó wa ọkọ̀ náà ni wọ́n ní ó fi ọkọ̀ náà já ìloro kínní àti ìkejì pẹ̀lú èròńgbà láti wọ ìloro kẹta níbi tí Kábíyèysí àrólé Oòduà, Ọọ̀nirìṣà Ọba Ògúnwùsì ń gbé, ṣùgbọ́n àwọn agbófinró tó ń ṣọ́ ààfin náà bá ya bò ó.
Gẹ́gẹ́ bí ọ̀rọ̀ tí alákòóso ọ̀rọ̀ ìròyìn fún Ọọ̀nirìṣà, Kọmureedi Ọlafare ṣe ṣàlàyé fún akọròyìn, Ajá kan tí wọ́n ní arákùnrin náà gbé sínú ọkọ̀ tí ó tú sílẹ̀, ni àwọn agbófinró ń lé kiri.
Ìró ìbọn tí wọ́n sì ń yìn sí ajá náà níbi tí wọ́n ti ń lé e kiri làwọn aráàlú gbọ́ tí wọ́n fi rò pé bóyá àwọn adigunjalè ló wọ ààfin.
Arákùnrin náà ní wọ́n ní ó wà ní àhámọ́ àwọn ọlọ́pàá báyìí tí ìròyìn sì ń jẹ́ kó di mímọ̀ pé ó ti bá wọn lálejò ní ẹ̀ka ọ̀tẹ̀lẹ̀múyẹ iléeṣẹ́ Ọlọ́pàá ní Òṣogbo.
Nínú ọ̀rọ̀ tó bá iléeṣẹ́ Ìròyìn kan ní ìlú Ọṣogbo sọ, alukoro fún iléeṣẹ́ ọlọ́pàá ní ìpínlẹ̀ Ọ̀ṣun, ASP Yẹmisi Ọpalọla, nínú àlàyé rẹ̀ dárúkọ arákùnrin náà gẹ́gẹ́ bí i Daramọla Wasiu.
Ọmọọsẹ́ tó súnmọ́ mi jù lọ satọ́nà bí wọ́n se jí ìbejì mi gbé — Akewugbagold
Ṣé wọ́n ní olè kò ní jàgbà, kó má kó fìrí, bẹ́ẹ̀ bíkú ilé ò pani,yóó sòro díẹ̀ kí kú tòde pààyàn . Ọ̀rọ̀ kò rí bẹ́ẹ̀ ni gbajúgbajà onímọ̀ nípa ẹ̀sìn Islam, Sheikh Taofeeq Akeugbagold tú pẹrẹpẹ́rẹ̀ ọ̀rọ̀ nípa irú èèyàn tí amúgbálẹ́gbẹ̀ rẹ̀, Opeyemi Oyeleye jẹ́. Ẹni yìí ni afurasí táwọn Ọlọ́pàá ló ṣe kòkàárí bí wọ́n ṣe jí ìbejì rẹ̀ gbé lọ.
Bẹẹ ba gbagbe, ọjọ Aje ni Ileesẹ Ọlọpaa ipinlẹ Oyo ṣe afihan oju awọn afurasi to ji ibeji Akeugbagold gbe lọ, ki wọn to ri wọn pada, ti Opeyemi si wa lara awọn afurasi naa. , nigba to n ba sọrọ lọjọ Isegun lori iṣẹlẹ naa salaye pe, ọmọkunrin to ni laakaye ni afurasi naa, o ni ọpọlọ, to si maa n ronu kọja ọjọ ori rẹ.
“Ọmọkùnrin náà ní ẹ̀kọ́ gan-an ni, ó gbọ́n púpọ̀, èyí tó mú kí n tètè fà á mọ́ra, kódà ó ń dùn mí pé ó fẹ́ fi gbogbo ẹ̀bùn rere tí Ọlọ́run fún un ṣòfò ni, torí mo ti fi ojú ṣùn-ún pé ọjọ́ iwájú rẹ̀ yóó dára.”
Onímọ̀ nípa ẹ ẹ̀ṣìn Islam náà ní, inú òun máa ń dùn láti ṣúnmọ́ ẹni tó lóye, ìdí nìyí tí òun fi fa afurasí náà mọ́ra débi pé, òun nìkan ló máa ń wọ yàrá ìbùsùn òun, tí àwọn sì dìjọ máa ń jẹun nínú àwo kan ṣoṣo lásìkò ìsínu ààwẹ̀.
” Gbogbo bá a ṣe ń wá àwọn ìbejì mi, kò sí eléyìí tí kìí gbọ́, ìdí sì rèé tó fi nira láti tètè rí wọn mú, àdúrà mi sì ló gbà, tá a fi tètè rí wọn mú.”Akeugbagold ní àwọn èèyàn tó lọ́wọ́ nínú bí wọ́n ṣe jí ìbejì òun gbé ní àwọn nílò owó ni àwọn ṣe hùwà náà, tí àwọn sì gbọ́ pé òun lówó lọ́wọ́, òun kàn ń fi ara pamọ́ ni.
” Ọ̀kan nínú wọn ló máa ń tẹ̀lé mi lọ gba owó táwọn èèyàn bá fẹ́ sanwó Hajj tàbí owó ilẹ̀ ,torí mò ń ta ilẹ̀ àti ilé, mo tún ní oko ńlá tá a ti ń ṣe nǹkan ọ̀sìn,afurasí yìí ló máa ń bá mi gba owó, àwọn nǹkan yìí ló kó sí wọn lójú.”
Nígbà tó ń ṣàlàyé pé òun kìí fi owó jẹ àwọn òṣìṣẹ́ òun níyà, àgbà Alfa náà tún sísọ lójú rẹ pé, ẹgbẹ̀rún lọ́nà ọgọ́rùn náírà ni òun máa ń ṣan fún àwọn méjéèjì tó ń ṣe àkóso ojú òpó ìtàkùn àgbáyé òun lẹ́yìn ààwẹ̀ Ramadan.
“Mo tún máa fún wọn ní ẹgbẹ̀rún méjì náírà ẹnì kọ̀ọ̀kan ní ojoojúmọ́, wọ́n yóó sínu ààwẹ lọdọ mi, lọ́dún tó kọjá, wọ́n gbé ìrẹsì, mílíìkì, òróró lọ sílé àmọ́ Kòrónáfairọ̀ọ̀sì kò jẹ́ kó rí bẹ́ẹ̀ lọ́dún yìí.”
Ó tun tẹ̀síwájú pé tí wáàsí ìta gbangba bá wà lásìkò ààwẹ̀ Ramadan, ọ̀kọ̀ọ̀kan wọn yóó mú tó ẹgbẹ̀rún lọ́nà ogún náírà lọ sílé, ṣùgbọ́n ó ní Kofi-19 kò jẹ́ kí wáàsí ààwẹ̀ ṣeéṣe lọ́dún yìí, èyí tó leè mú kí owó wọ́n tó ná.
Nígbà tó ń sàlàyé bó ṣe ṣe salábàápàdè afurasí náà, tó fi dé ọ̀dọ̀ rẹ, Akeugbagold ní láti ipaṣẹ̀ èèyàn kan tó ní orúkọ rere láàrin ìlú, tó sì ń ṣe dáadáa ni òun ti mọ Ọmọdékùnnrin náà.
Ó ní òun nílò ẹni tí yóó máa ṣe àkóso ojú òpó ayélujára òun lásìkò ààwẹ̀, ní òun fi gbà á sọ́dọ̀ , láì mọ̀ pé ọmọkùnrin náà ti ṣe àìdáa rí lọdọ Ọ̀gá rẹ̀ tẹ́lẹ̀.
“Ní ọjọ́ tí wọ́n jí àwọn ìbejì mi gbé lọ, èmi pẹ̀lú rẹ la dìjọ wà nínú mọ́tò, bí wọ́n sì ṣe pè mí láti Ilé pé wọ́n ti jí àwọn ọmọ gbé lọ, a dìjọ ń lé gbogbo mọ́tò tó jọ ti àwọn ajínigbé náà ni, tó sì ń ṣe ètò lórí rédíò, bẹ́ẹ̀ ló ń bẹ̀bẹ̀ lórí ìkànnì abánidọ́rẹ̀ẹ́ rẹ̀ Facebook pé kí wọ́n tú àwọn ọmọ náà sílẹ̀.”
Akeugbagold fikún un pé afurasí náà ń fò fáyọ̀ lásìkò tí wọ́n tú àwọn ọmọ náà sílẹ̀ ni, tí kò sì sí ẹni tó fura sí i pé ejò rẹ̀ lọ́wọ́ nínú ìṣẹ̀lẹ̀ náà.
Akeugbagold ni òun ti dáríjìn àwọn afurasí ajọ́mọgbé náà, tí òun sì setán láti ràn hán lọ́wọ́ tó bá jáde ní àhámọ́, òun sì ń gbàdúrà fún pé kó yí ìwà rẹ̀ padà, kó lè di Ààfáà ńlá.
Èèyàn ẹgbẹ̀rún kan àti irínwó dín mẹ́fà bá Kofi 19 rìn l’Amẹ́ríkà lópin ọ̀sẹ̀.
À fi kí á bẹ Ọlọ́run kó báwa dáwọ́ ibi dúró nílẹ̀ yìí àti lókèèrè to rí igbi gbogbo la lẹ́ni sí lórílẹ̀. Gbogbo ìgbà ni àjàkálẹ̀ àrùn apinni léèmí Kofi 19 ń pitú ọwọ́ rẹ̀ káàkiri àgbáyé o, bí ó se tun ti nawọ́jà rẹ̀ gbemi eeyan to pọ ni Amẹ́ríkà.
Ilẹ̀ Amẹ́ríkà tún ti ṣe àkọsílẹ̀ ikú ènìyàn ẹgbẹ̀rún kan àti irínwó dín mẹ́fà látàrí àrùn Kòrónáfairọ̀ọ̀sì
Èyí sì ti mú àpapọ̀ ènìyàn tó ti kú di ẹgbẹ̀rún méjì dín láàádọ̀rún lè ẹ̀ẹ́dẹ́gbẹ̀rin ati mẹ́sàn an (88,709)
Àjọ tó ń mójú tó ìgbógun ti àjàkálẹ̀ àrùn ní Amẹ́ríkà (CDC) ló kéde èyí lọ́jọ́ Aìkú,
Wọ́n fi kún un pé mílíọ̀nù kan àti ẹgbẹ̀rún lọ́nà irínwó lé mẹ́tàdínláàdọ́rin àti márùn-únlélọ́gọ́ta ló ti ní àrùn ajániláyà pàtì méèmí ẹni lọ ọ̀hún. (1,467,065) èyí jẹ́ àfikún ẹgbẹ̀rún lọ́nà ogójì sí díẹ̀ sí èyí tí wọ́n ní tẹ́lẹ̀.
Orílẹ̀-èdè Amẹ́ríkà ló ní àkọsílẹ̀ àwọn tó kú jù nítorí àrùn Kofi 19 lágbàáyé.
Ṣáájú ni Ààrẹ ilẹ̀ Amẹ́ríkà tẹ́lẹ̀ rí Barack Obama ti ṣèkìlọ̀ lórí bí Ààrẹ Donald Trump se ń mú àrùn apinni léèmí náà Kòrónáfairọ̀ọ̀sì.
Iléèṣẹ́ ọlọ́pàá ti ṣe àfihàn àwọn afurasí tó jí ìbejì Akeugbagold gbé ní ìlú Ìbàdàn
Àwọn àgbà bọ̀ wọ́n ní, àṣẹgbé kan kò sí, àsepamọ́ ló wà.Ni báyìí, kélé òfin ti mú àwọn ọ̀daràn tó jí àwọn ìbejì Alhaji Taofẹẹq Akewugba Gold gbé.
Méje ni àwọn kọ̀lọ̀rànsí ọ̀daràn náà, ọkùnrin mẹ́fà àti obìnrin atẹ̀yìntọ̀ kan tí wọ́n gbà láti tọ́jú àwọn ìbejì ní gbogbo ọjọ́ mẹ́jọ tí wọ́n lò lákàtà àwọn ajínigbé.
Ohun ìyàlẹ́nu ni wí pé méjì nínú Yatọ si pe ọwọ tẹ wọn, miliọnu mẹta din ẹgbẹrun lọna igba Naira (2.8m), ni awọn afurasi naa sọ pe awọn naa owo ti wọn gba fun itusilẹ awọn ọmọ naa ku.
Miliọnu mẹẹrin Naira ni wọn gba. ọ̀daràn náà ló sún mọ́ Bàbá ìbejì pẹkipẹki gẹ́gẹ́ bí òṣìṣẹ́, mílíọ̀nù mẹ́rin Náírà ni wọ́n gbà kí wọ́n tó jọwọ ẹmi àwọn ọmọ náà.
Kọmísánà Àjọ ọlọ́pàá nípìńlẹ̀ Ọ̀yọ́, Ṣina Olukolu ló ṣe àfihàn àwọn ọ̀daràn náà lọjọ Ajé ní olú iléeṣẹ́ ọlọ́pàá tó ń bẹ ní agbègbè Ẹlẹyẹle nílùú Ìbàdàn.
Yàtọ̀ sí pé ọwọ́ tẹ̀ wọ́n, mílíọ̀nù mẹ́ta dín ẹgbẹ̀rún lọ́nà igba Náírà (2.8m), ni àwọn afurasí náà sọ pé àwọn ná owó tí wọ́n gbà fún ìtúsílẹ̀ àwọn ọmọ náà kù.
Aja to rele Ekun to bo, o ye ki a kii ku ewu. Gbajugbaju oludasile ileese redio ati telifison Ray power ati AIT ni o se alabapade ajakale arun coronavirus ni nnkan bii ose meji to koja lo. Arun yii ko mu oun nikan, o tun mu mefa miiran ninu ebi re. Oni yii ni ori ko alagba naa yo pelu awon ebi re mefeefa. Oluulu Naijiria, Abuja ni won ti ģba iwosan tiwon, ni ibi ti won ti n se itoju awon ti ajakale naa ba ko lu.
Gbogbo awon ebi, ore ati ojulumo lo ti bere si ni ki alagba naa ku oriire. Nitori pe aisan naa buru de bii wo pe ko mo olowo bee ni ko mo talaka sugbon Eledua ko won yo.
À nì sẹ́, dan dan l’óúnjẹ ọfẹ fún ọmọ rẹ ,kíláàsì kínní dé ìkẹta alákọ̀ọ́bẹ̀rẹ̀- Ìjọba àpapọ̀
Iléeṣẹ́ tó wà fún ìpèsè ohun ìrànwọ́ nílẹ̀ wa ló sísọ lójú ọ̀rọ̀ yìí nínú àtẹjáde kan tó fisíta lójú òpó abẹ́yefò Twitter rẹ̀.
Àtẹjáde náà ní gbogbo Ìpínlẹ̀ tó wà ní Nàìjíríà ni wọ́n ti rọ̀ láti lo gbogbo àkọsílẹ̀ tó wà nkàáwọ́ wọn láti tọ ipaṣẹ̀ ilégbèé àwọn akẹ́kọ̀ọ́ tó wà láwọn Ilé ẹ̀kọ́ alákọ̀ọ́bẹ̀rẹ̀ Ìjọba.
Ṣùgbọ́n yàtọ̀ sí bó ṣe ń wáyé tẹ́lẹ̀, Ìjọba ní àwọn òbí àti alágbàtọ́ àwọn akẹ́kọ̀ọ́ tó lẹ́tọ̀ọ́ sí oúńjẹ ìjọba náà, ni wọn yóó gbe fún.
“Kìkìdá àwọn akẹ́kọ̀ọ́ tó wà ní kíláàsì kínní sí ìkẹta láwọn Ilé ẹ̀kọ́ alákọ̀ọ́bẹ̀rẹ̀ Ìjọba nìkan, ni yóó jẹ àǹfààní ìpèsè oúnjẹ náà, èyí tí yóó kan ojúlé bílíọ́nù mẹ́ta ó lé díẹ̀, 3,131,971.”
Lára àwọn èròjà oúnjẹ tí Ìjọba yóó pín fún ìdílé akẹ́kọ̀ọ́ kọ̀ọ̀kan tó lẹ́tọ̀ọ́ sí oúńjẹ náà ni, àpò ìrẹsì oní kílógíràmù márùn-ún (5kg), àpò ẹ̀wà oní kílógíràmù márùn-ún bákan náà, òróró ẹ̀ẹ́dẹ́gbẹ̀ta mìlílítà 500ml, epo Pupa oní ọ̀tàlélẹ́ẹ̀dẹ̀gbẹ̀rin ó dín mẹ́wàá mìlílítà, 750ml, iyọ oní ẹ̀ẹ́dẹ́gbẹ̀ta mílígíràmù, 500mg, ẹyin ẹyọ mẹ́ẹ̀ẹ́dógún àti tómátò lílọ̀ lúbú-lúbú oní mílígíràmù ogóje, 140gm.
Ìjọba ní àpapọ̀ gbogbo owó àwọn èròjà tí wọ́n fẹ́ pín fún àwọn òbí akẹ́kọ̀ọ́ kọ̀ọ̀kan tó lẹ́tọ̀ọ́ sí oúńjẹ náà, jẹ́ ẹgbẹ̀rún mẹ́rin àti igba Naira, N4,200.
“Ìgbésẹ̀ pínpín ìwé ẹ̀tọ́ sí oúnjẹ náà, tá a pè ní Voucher ti ń wáyé lọ́wọ́ nílùú Àbújá àti Èkó, tí Ìjọba sì ti ń pèsè owó fún àwọn Ìjọba Ìpínlẹ̀ láti sètò ìpèsè oúńjẹ fún akẹ́kọ́ọ̀ nípìnlẹ̀ kóówá wọn.”
Bá a kú làá dère, èèyàn kò sunwọ̀n láàyè.Gómìnà Ṣèyí Mákindé ti sàpèjúwe ọ̀kan lára àwọn Kọmíṣọ́nnà rẹ̀, Kẹhinde Ayọọla tó papòdà ní Ọjọ́bọ, ọjọ́ kẹrìnlá oṣù karùn ún ọdún 2020 bí ọ̀rẹ́ tòótọ síi. Kẹhinde Ayọọla ló jáde láyé lẹ́yìn àìsàn ráńpẹ́.
Gbínrín gbínrín ni gbogbo ọ́fíìsì kan ní ìpínlẹ̀ náà,ti nǹkan sì dákẹ́ tójú gbogbo sì fàro ni ìdárò ikú rẹ̀. Gómìnà ìpínlẹ̀ Ọ̀yọ́ ti sàpèjúwe ikú Kọmíṣọ́nnà náà bíi àjálù ńlá tó báni lójijì. Ó ní ó jẹ́ ìbànújẹ́ ńlá fún òun nítorí pé ọrẹ ni olóògbé náà jẹ́ sí òun.
Gómìnà Mákindé ní ọdún 2002 l’òun àti olóògbé Kẹhinde Ayọọla pàdé, tí ó sì jẹ́ Olóòtọ́ àti olùfọkànṣìn èèyàn.
Gómìnà Mákindé nìkan kọ ló dárò Kọmíṣọ́nnà fọ́rọ̀ àyíká àtọ̀hún àlùmọ́ọ́nì ìpínlẹ̀ Ọ̀yọ́ náà, Ẹgbẹ́ òṣèlú PDP àti APC pẹ̀lú kò gbẹ́yìn.
Nínú ọ̀rọ̀ ìbánikẹ́dùn tirẹ̀, ẹgbẹ́ òṣèlú PDP nínú àtẹjáde kan tí wọ́n fi síta èyí tí agbẹnusọ rẹ̀, Akeem Ọlatunji fọwọ́sí sàpèjúwe Ayọọla gẹ́gẹ́ bí akínkanjú ọmọogun tó sì tún jẹ́ ẹlẹ́yinjú àánú nígbà ayé rẹ̀.
Ní tirẹ̀, ẹgbẹ́ òṣèlú APC sàpèjúwe ikú rẹ̀ gẹ́gẹ́ bíi àjálù ńlá fún gbogbo olùgbé ìpínlẹ̀ Ọ̀yọ́.
Bákan náà ni ẹgbẹ́ àwọn Alága Ìjọba ìbílẹ̀, ALGON ní ìpínlẹ̀ Ọ̀yọ́ pẹ̀lú sọ̀rọ̀, tí wọ́n sì wòye pé, lójú tàwọn , olóògbé Kẹhinde Ayọọla nìkan làwọn rí gẹ́gẹ́ bíi ọlọpọlọ pípé tí àwọn rí tọ́kasí ní ìṣèjọba Gómìnà Ṣèyí Mákindé.
Kọmíṣọ́nnà fọ́rọ̀ àyíká àtohun àlùmọ́ọ́ní ní ìpínlẹ̀ Ọ̀yọ́, Kẹhinde Ayọọla dákẹ́ sí iléèwòsàn aládàáni kan lágbègbè Iyaganku ni ìlú Ìbàdàn, gẹ́gẹ́ bí àwọn ìwé Ìròyìn abẹ́lé ṣe sọ.
Títí di bí a ṣe ń kó Ìròyìn yìí jọ, kò tíì sí ẹni leè sọ ní pàtó ohun tó ṣokùnfà ikú rẹ̀, ṣùgbọ́n ohun tí a gbọ́ ni pé, òun fúnra rẹ̀ ló wa ọkọ̀ lọ sí iléèwòsàn náà ní ọ̀sẹ̀ méjì sẹ́yìn fún àyẹ̀wò ìlera rẹ̀ tí wọ́n sì dáa dúró láti sinmi. Láti ìgbà náà wá ni a gbọ́ pé ó ti wà níbẹ̀ kí ó tó dágbére fáyé lọ́jọ́bọ.
*Ìwà rere* Iléere ní ẹ̀ṣọ́ nínú Ìwà’bàjé ní jẹ́ k’ọ́mọ o j’ìyà Ẹwúrẹ́ ya aláìgboràn Àgùntàn jẹ́ oníwàpẹ̀lẹ́ Adígbánnákú ṣẹ̀yìn gákangàkan
Iléere ní ẹ̀ṣọ́ nínú Ìwà rere lẹ̀sọ́ ènìyàn Ìwà rere ni òbí ní, tí wọ́n fi ń ǹpé ní òbí rere Òbí rere ló le kọ́mọ ní’wà rere Òbí rere ní fi ìwà rere kọ́ni
Ìwà rere kọjá ẹ̀sìn Ẹ̀sìn bá ìwà rere láyé ni Kíì ṣe ẹ̀sìn ní kọ́ni níwà rere Ìwà rere ni ẹ̀sọ́ ènìyàn
Ìpáǹle kìí ṣe ìwà tó tọ́ Àigbọ̀ràn kìí ṣè’wà rere Agbójúlógun firarẹ̀ fóṣì ta Ká-tẹ-pá mọ́ ‘ṣẹ́ ohun pẹ̀lú ìwà Ojúkòkòrò kìí ṣèwà ire Ìwà rere dántọ́, ó tayọ, ó yàtọ̀, Ìwà rere ní àpọ́nlé Óń buyì kún ní Óń fi ni hàn lọ́nà tó gún Óń kóni yọ nínú ewu
Ká tọ́ jú ìwà to pé, tó tọ́ Gbogbo èèyàn ló dá ọmọluàbí mọ̀ Èéfín nìwà Ìwà kò ́ṣèe kó pamọ́ sínú ǹkankan Ìwà kò ṣeé bò mọ́lẹ̀ bí èbù iṣu Ìwà ma ń ru sókè láìrò
Tọ́jú ìwà rẹ ọ̀rẹ́ mìi Kí tẹrú tọmọ lè pọ́n ọ lé Ìwà rere ǹgbèni débi ayọ̀ Ẹní bá níwà ní jọlá, ẹní bá níwà níí jọlà Ẹníbà níwà ní jère ire Tọ́jú ìwà rẹ ọ̀rẹ́ mìi Ìwà rere lẹ̀ṣọ́ ènìyàn.
Èeyàn 239 míràn ni àrùn Covid-19 lórílẹ̀-èdè Nàìjíríà
À fi kí Ọlọ́run sàánú wa lórí àjàkálẹ̀ àrùn apinni léèmí kòrónáfairọ̀ọ̀sì yìí tó ń gbomi lójú t’olórí t’ẹlẹ́mù, bí Ìjọba orílẹ̀-èdè Nàìjíríà tí tún kéde àwọn ènìyàn tuntun tó ṣẹ̀ṣẹ̀ kó àrùn apinni léèmí kòrónáfairọ̀ọ̀sì. Ní báyìí, ènìyàn ẹgbẹ̀rún mẹ́rin lé ni ọ̀kànléláàdọ́jọ (4151) ló ti ní àrùn náà ní Nàìjíría.
Àjọ tó ń gbógun ti àjàkálẹ̀ àrùn lọ́rílẹ̀-èdè Nàìjíríà (NCDC) kéde lórí àtẹjísẹ́ wọ́n lálẹ́ ọjọ́ sátide ló fi ìkéde náà síta.
Gẹ̀gẹ́ bí àjọ náà ṣe sọ, ẹ̀nìyàn mẹ́tàdínlọ́gọ́rùn-ún (97) ló lùgbàdì arùn náà ni ìpínlẹ̀ Èkó, mẹ́rìnlélógójì (44) ni Bauchi, mọ́kàndínlọ́gbọ̀n (29) ní Kano àti mọ́kàndílógún (19) ní Katsina.
Ìpínlẹ̀ Borno ní mẹ́tàdínlógun (17), Abuja ,ènìyàn méje (7), Kwara mẹ́fà (6), Ọ̀yọ́ márùn-ún (5) nígbà tí Sokoto àti Adamawa ní ènìyàn mẹ́ta-mẹ́ta.
Kebbi, Ogun àti Plateau ní ènìyàn méjì-méjì nígbà tí Èkìtì ní ènìyàn kan soso.
Láti ìgbà ti àrùn náà ti bẹ̀rẹ̀ ní ọjọ́ kẹtàdílọ́gbọ̀n oṣù kejì ọdún 2020, ni ó tí tàn kálẹ̀ sí ìpínlẹ̀ mẹ́rìnlélọ́gbọ̀n àti Abuja báyìí.
Ìpínlẹ̀ Èkó náà sì ni ìpínlẹ̀ tó ní ènìyàn tó pọ̀ jù nítórí ibẹ̀ ni a ti rí ẹni àkọ́kọ́, ènìyàn tó lé ní ẹgbẹ̀run kan ààbọ ló ti ní àrùn náà ní ìpínlẹ̀ Èkó, Ìpínlẹ̀ Kano ló tèlé, pẹ̀lú ènìyàn ọgọ́rùn márùn lé mẹ́rìndinlọ́gọ́rin, lẹ́yìn náà ni Àbújá tí òǹkà fìdí rẹ̀ múlẹ̀ pé ènìyàn ọ̀ọ́dúnrún lé mẹ́tàlélógójì ló ti lùgbàdi àrùn ajániláyà pàtì méèmí ẹni lọ ọ̀hún.
