Category: Awọn Iroyin Agbegbe

EndSARS: Olórí ilé aṣojú-ṣòfin ní ìṣúnà 2020 gbọdọ̀ pèsè owó fún ASUU bí bẹ́ẹ́kọ̀…

Fẹ́mi Akínṣọlá

Olórí ilé asojú-sòfin nílẹ̀ wa, Fẹ́mi Gbàjàbíàmílà ti sòṛọ̀ nípa àwọn ìṣẹ̀lẹ̀ tó se kókó tó n wáyé nílẹ̀ wa, paàpá ìwọ́de EndSARS.

Gbàjàbíàmílà, ẹni tó sọ̀rọ̀ yìí nínú àkànse ọ̀rọ̀ tó báwọn aráàlú àtàwọn asojú-sòfin sọ níbi ìjókòó ilé asojú-sòfin tó wáyé lój̣ọ́ Ìṣẹ́gun, wá kéde àwọn ìgbésẹ̀ tó fẹ́ gbé lóti yanjú àwọn ìṣèḷẹ̀ náà.
Gbàjàbíàmílà ní lákọ̀ọ́kọ́, òun kò ní buwọ́ lu ètò ìsúná ọdún 2020 láì jẹ̀ pé ó pèsè owó ìrànwọ́ fáwọn mọ̀lẹ́bí àwọn èèyàn tó jáláìsí lásìkò ìwọ́de náà.

Bákan náà ló ní òun kò ní buwọ́lu ètò ìṣúná ọ̀hún, tí kò bá pèsè owónàá fún ẹgbẹ́ ASUU láti wá ìdáhùn sí ohun tí wọ́n n bèèrè fún.

Olórí ilé asojú-sòfin ní ilé asòfin náà yóó tún ríi dájú pé ìjọba gbé ìgbésẹ̀ láti se àtúnṣe àti àtúntò àwọn iléẹ̀kọ́ gíga gbogbo nílẹ̀ wa, tí yóó fi bá òde òní mu.
Ó ní òun kò ní buwọ́lu ètò ìsúná náà, tí kò bá ya owó nlá sọ́tọ̀ láti se àtúnṣe àwọn iléẹ̀kọ gíga wa.

Kò tán síbẹ̀, Gbàjàbíàmílà tún ní òun yóó ri dájú pé òun kàn sáwọn mọ̀lẹ́bí àwọn èèyàn tó pàdánù ẹbí wọn lásìkò ìwọ́de EndSARS yìí, láti tù wọ́n nínú.

Ó fikún-un pé, Ilé asòfin yóó tún sakitiyan láti ríi dájú pé àbá òfin tó n se àtúntò sí ètò ìdìbò nílẹ̀ wa dòhun, lọ́nà àti pèsè ìdìbò tó mọ́yán lórí ní Nàìjíríà.

Olórí ilé asojú-sòfin tún fọwọ́ gbáyà pé àtúnṣe òfin ilẹ̀ wa yóó wáyé, èyí tí yóó mú kó dángájíá láti fìdí ẹ̀tọ̀ ọmọnìyàn múlẹ̀.
Bákan náà ló ní ilé asòfin yóó sisẹ̀ lórí ọna táwọn ẹkun kọọkan yóó fi máa se àkóso àwọn ohun álùmọ́ọ́nì tó wà ní ẹkùn wọn, gég̣ẹ́ báwọn ọmọ ilẹ̀ yìí ti n fẹ́.

Gbàjàbíàmílà wá korò ojú sí ìwà ta ni yóó mú mi táwọn ọlópàá ̣n hù, tó sì ní wọn kò ga ju òfin lọ lọ́nà kọnà, èyí tó bá sì tàpá sí òfin, ló yẹ kí ọ̀bẹ òfin bà.

Jàǹdùkú pa ọlọ́pàá méjì, jó àgọ́ wọn mẹ́wàá, báńkì mẹ́ta, jí ọ̀pọ̀ owó l’Ékó -iléeṣẹ́ ọlọ́pàá

Fẹ́mi Akínṣọlá

Àwọn àgbà bọ̀ wọ́n ní, ìjàngbọ̀n kìí dúró síbi tó bá rọ̀, bí kò ṣe ibi tó bá le koko.

Iléeṣẹ́ ọlọ́pàá ti ké síta lórí bí àwọn jàǹdùkú tó fi ìwọ́de End SARS bojú, ṣe ń kọlu àwọn ọ́fíìsì àtàwọn òṣìṣẹ́ wọn ní ìpínlẹ̀ Èkó.

Iléeṣẹ́ ọlọ́pàá kéde bẹ́ẹ̀ nínú àtẹjáde kan tó fi ṣọwọ́ sí àwọn akọ̀ròyìn, èyí tí alukoro iléeṣẹ́ náà ní ìpínlẹ̀ Èkó, Olumuyiwa Adejobi, buwọ́lù.

Ó ní àwọn jàǹdùkú náà pa ọlọ́pàá méjì ní àgọ́ wọn tó wà ní Orile, bẹ́ẹ̀ ni wọ́n tún ṣe ogun lọ́gọ̀ ọlọ́pàá lése, kí wọ́n tó dáná sun àwọn agbègbè mẹ́wàá míì, tí àwọn ọlọ́pàá máa ń kórajọ sí.
Lára àwọn àgọ́ ọlọ́pàá tí ọ̀rọ̀ náà kan ni ti Igando, Layeni, Denton, Ilenbe Hausa, Ajah, Amukoko, Ilasa, Cele labẹ Ijesha.

Bákan náà ni wọ́n tún kọlu ọ́fíìsì SARS tó wà ní Ajegunle, Ebute-Ero Mushin níbi tí wọ́n ti ṣíná ìbọn fún ọlọ́pàá méjì, pẹ̀lú Ojo àti Ajegunle níbi tí wọ́n ti jó ọkọ̀ ọlọ́pàá meji méjìméjì.
Kò tán síbẹ̀, àtẹjáde náà ní “Àwọn jàǹdùkú ọ̀hún tún dáná sun báńkì mẹ́ta, tí wọ́n sì jí ẹgbẹ̀lẹ́gbẹ̀ owó kó lọ, ṣùgbọ́n a rí díẹ̀ lára mú, tí a sì gba ohun ìjà olóró àti owó tí wọ́n jí kó lọ́wọ́ wọn.”

Ní Ajégúnlẹ̀, wọ́n dáná sun ọ́fíìsì Ìjọba ìbílẹ̀ Ajeromi Ifelodun tí wọ́n sì tún ba àwọn dúkìá jẹ́ níbẹ̀.

Àwọn jàǹdùkú náà tún ṣàkọlù sí ààfin ọba ìlú Èkó, ilé ìtajà Shoprite, iléeṣẹ́ ọkọ̀ ojú omi ní Marina àti ilé ìyá Gómìnà ìpínlẹ̀ Èkó tó wà ní Akerele.
Bákan náà ni wọ́n tún jó ọ́fíìsì àwọn VIO ní Ojodu, ilé ẹjọ́ májísírètì ní Igbosere, iléeṣẹ́ Ìròyìn TVC àti The Nation, àti bẹ́ẹ̀ bẹ́ẹ̀ lọ.

Iléeṣẹ́ ọlọ́pàá náà fi kún un pé, ọ̀pọ̀ èèyàn ló dágbére fáyé nítorí ìkọlù àwọn jàǹdùkú náà, tí àwọn mẹ́rin kan sì farapa yánayàna.

Lẹ́yìn náà ló ní bó tilẹ̀ jẹ́ pé àwọn èèyàn lẹ́tọ̀ọ́ lábẹ́ òfin láti ṣe ìfẹ̀hónúhàn, iléeṣẹ́ ọlọ́pàá kò ní fààyè gba irú rògbòdìyàn báyìí mọ́.

Ìṣẹ̀lẹ̀ Lekki, Ẹ̀ẹ̀mejì ni mo pe Ààrẹ Buhari lánàá , àmọ́ ń kò ri bá sọ̀rọ̀ – Sanwo-Olu

Fẹ́mi Akínṣọlá

Bí ọ̀rọ̀ ńlá kò bá tíì tán èèyàn ńlá kò ní tíì sinmi àròyé Sanwo-Olu tíí se Gómìnà wọn ní ìpínlẹ̀ Èkó tún ti gbóhùn sókè sàlàyé pé òun kò tíì rí ààyè bá Ààrẹ Muhammadu Buhari ṣọ̀rọ̀ lórí ìṣẹ̀lẹ̀ náà, títí di àkókò yìí.

Ó ní òun pe Ààrẹ Buhari lórí ìṣẹ̀lẹ̀ ìpànìyàn náà láàrọ̀ àná, àmọ́ wọ́n ń bùn mi gbọ́ pé kò tíì dé sí ọ́fíísì.

Ó fikún un pé òun tún padà pè lórí aago, àmọ́ tí wọ́n sọ fún òun pé ó wà ní ìpàdé Ìgbìmọ̀ aláṣẹ Ìjọba ilẹ̀ yìí tó ń wáyé lánàá.

Bákan náà ni Sanwo-Olu ní olórí iléeṣẹ́ ọmọ ológun ilẹ̀ wa ti pe òun lórí ìṣẹ̀lẹ̀ tó wáyé lọ́jọ́ Ìṣẹ́gun ọ̀hún.

Gómìnà Ìpínlẹ̀ Èkó, nínú ìfọ̀rọ̀wánilẹ́nuwò ọ̀hún tún sísọ lójú rẹ̀ pé ìjọba òun ti gbé igba mílíọ̀nù náírà kalẹ̀ bíi owó gbà má bínú fáwọn èèyàn tó forí sọta ìwọ́de EndSARS náà.

Ó wá rawọ́ ẹ̀bẹ̀ sáwọn ọ̀dọ́ tó ń sèwọ́de láti fi orúkọ èèyàn méjì sílẹ̀, tí yóó ṣojú wọn nínú Ìgbìmọ̀ olùwádìí tí Ìjọba gbé kalẹ̀ lórí ẹ̀hónú wọn.

Gómìnà ìpínlẹ̀ Èkó ní àsìkò tó tọ́ yẹ kí wọ́n fààyè gba àwọn ìpínlẹ̀ láti ní ọlọ́pàá tiwọn, Kódà, ó ní ọ̀rọ̀ náà ti pẹ́ jù.