Àṣà Oòduà

Tag: Asa Oodua

  • È̩ ń fi ẹ̀wọ̀n run imú ẹ̀yin Olóyè Ìbàdàn mọ́kànlélógún tẹ ń ǹ pera a yín lọ́ba

    Ọrọ̀ kò tíì tán lórí àwọn Olóyè mọ́kànlélógún tí Ilé ẹjọ́ sọ pé kí wọ́n lọ rọọ́kún nílé nílùú Ìbàdàn.

    Kọmíṣọ́nnà ètò ìdájọ́ tẹ́lẹ̀rí nípìńlẹ̀ Oyo, Ọ̀gbẹ́ni Michael Lànà ló ṣe ìkìlọ̀ fún wọn pé, kí wọ́n yé pe ara wọn ní ọba káàkiri, bí bẹ́ẹ̀kọ́, wọ́n ń fi ẹ̀wọ̀n run imú ni.

    Nínú àtẹ̀jáde kan tí Ọ̀gbẹ́ni Lànà fi síta lọ́jọ́ Ajé, ó sọ wí pé bí àwọn Olóyè náà tí ń pe ara wọn, tí wọ́n sì ń gbé ara wọn gẹ̀gẹ̀ bi ọbí lòdì sí àṣẹ ilé ẹjọ́.

    ”Ìgbésẹ̀ ìjọba àná nípìńlẹ̀ Ọyọ tó fún àwọn Olóyè mọ́kànlélógún láti máa dé adé ìlẹ̀kẹ̀, àti láti máa pe ara wọn ní Ọba lòdì sí òfin,” Ọ̀gbẹ́ni Lànà ló wòye bẹ́ẹ̀

    Ó ṣàlàyé síwájú síi pé ìdájọ́ Ilé ẹjọ́ gíga ìpínlẹ̀ Ọ̀yọ́ tó wáyé lọ́jọ́ kọkàndínlógún oṣù Kọkànlá ọdún 2019 ti gbé ìgbésẹ̀ ìjọba àná lórí àwọn Olóyè Ìbàdàn sẹ́ẹ̀gbẹ́ kan.

    Ọ̀gbẹ́ni Lànà ṣọ pé ìyàlẹ́nu ló jẹ́ pé àwọn kan sì tún ń wọ adé ìlẹ̀kẹ̀ tí wọ́n sì ń pe ara wọn ní Ọba ìlú Ìbàdàn.

    Ó ní Ìjọba kò ní bèṣùbẹ̀gbà láti gbé ìgbésẹ̀ lórí bí àwọn Olóyè mọ́kànlélógún náà ṣe ń pe ara wọn ní Ọba káàkiri.

    Ọ̀gbẹ́ni Lànà wá ké pe Kọmíṣọ́nnà ọlọ́pàá ìpínlẹ Ọyọ pé kó pàṣẹ fáwọn agbófinró láti fi ọwọ́ òfin mú ẹnikẹ́ni nínú àwọn Olóyè náà tó bá ń pe ara rẹ̀ lọ́ba.

    Fẹ́mi Akínṣọlá

    http://iroyinowuro.com.ng/2020/01/02/e%cc%a9-n-fi-ewon-run-imu-eyin-oloye-ibadan-mokanlelogun-te-n-%c7%b9-pera-a-yin-loba/

  • Àmọ̀tẹ́kùn: Ẹ̀ṣọ́ ilẹ̀ Oòduà (Yorùbá) ‘Àmọ̀tẹ́kùn’ ṣetán láti bẹ̀rẹ̀ iṣẹ́ káàkiri ilẹ̀ káàárọ̀ o ò jíire

    Ẹ̀ṣọ́ ilẹ̀ Oòduà (Yorùbá) ‘Àmọ̀tẹ́kùn’ ṣetán láti bẹ̀rẹ̀ iṣẹ́ káàkiri ilẹ̀ káàárọ̀ o ò jíire.

    Àmọ̀tẹ́kùn
    Àmọ̀tẹ́kùn

    Ọ̀rọ̀ ti di olójú ò níí yajú ẹ̀ sílẹ̀ kí tàlùbọ̀ ó yíwọ̀ọ́ àti pé ọmọ onílùú kò níí fẹ́ ó tú lọ̀rọ̀ dà báyìí ó, bí.
    Gómìnà ìpínlẹ̀ Èkìtì, Kayode Fayemi ti kéde pé gbogbo ètò ti tò báyìí fún Ilé iṣẹ́ ètò ààbò ilẹ̀ Oòduà (Yorùbá) ”Àmọ̀tẹ́kùn”” láti bẹ̀rẹ̀.

    Fayemi ní ọjọ́ kẹsàn án, oṣù kínní, ọdún 2020 ni ètò náà táwọn gómìnà mẹ́fà apá gúúsù orílẹ̀-èdè- Nàìjíríà ìwọ̀ oòrùn ṣe àgbékalẹ̀ rẹ̀ yóó bẹ̀rẹ̀ káàkiri ilẹ̀ Oòduà (Yorùbá).

    Àmọ̀tẹ́kùn

    Gómìnà Fayemi fi ọ̀rọ̀ ọ̀hún léde nínú ọ̀rọ̀ ọdún tuntun tó báwọn èèyàn ìpínlẹ̀ Èkìtì sọ L’ọ́jọ́rù, ọjọ́ kínní, oṣù kínní, ọdún 2020.
    Fayemi ṣàlàyé pé àwọn ẹ̀ṣọ́ ‘Àmọ̀tẹ́kùn”’ yóó máa ṣe ìrànwọ́ fún àwọn agbófinró ní gbogbo ìpínlẹ̀ mẹ́fà nílẹ̀ Oòduà (Yorùbá).

    Gómìnà Èkìtì ní Ìjọba ti setán láti ríi pé ètò ààbò gbópọn síi nílẹ̀ Oòduà (Yorùbá).

    Ó ní lóòtọ́ọ́ ni pé ìwà ọ̀daràn kò le tán nílẹ̀ pátápátá, à mọ́ àwọn gómìnà mẹ́fẹ̀ẹ̀fà ti fẹnu kò láti ríi pé ìwà ọ̀daràn dínkù káàkiri ilẹ̀ káàárọ̀ o jíire.

    Àmọ̀tẹ́kùn
    Àmọ̀tẹ́kùn

    Ẹ̀wẹ̀, ẹgbẹ́ OPC àtàwọn ẹgbẹ́ ajìjàgbara míì nílẹ̀ Oòduà (Yorùbá) ti ké pe àwọn gómìnà yìí tẹ́lẹ̀ pé kí wọ́n fáwọn láṣẹ láti ṣiṣẹ́ pọ̀ pẹ̀lú àwọn agbófinró láti gbógun ti àwọn jàǹdùkú tó ń dá rògbòdìyàn sílẹ̀ nílẹ̀ Oòduà (Yorùbá).

    Fẹ́mi Akínṣọlá

  • Ohun t’ọ́kùnrin ń ṣe l’Ekiti, obìnrin lè ṣe é. Àjọ̀dún Àṣà ìbílẹ̀ lékìtì

    Ohun t’ọ́kùnrin ń ṣe l’Ekiti, obìnrin lè ṣe é.. Àjọ̀dún Àṣà ìbílẹ̀ lékìtì

    Fẹ́mi Akínṣọlá

    Àṣà àti ìṣe wà nínú n tíí ṣàfíhàn èèyàn bí ọmọ ọkọ tàbí ọmọ ìdàkejì n ló díá fún bí onírúurú ohun tẹ́ ẹ̀ tilẹ̀ mọ pé ó wà láyé yìí se dohun àfojúrí níbi ayẹyẹ àjọ̀dún àṣà ọdún yìí ní ipinlẹ Èkìtì, .

    Adarí iléeṣẹ́ Àṣà ni ìpínlẹ̀ Èkìtì, Wale Ojo sọ fún akọ̀ròyìn pé àwọn ń kó àwọn àṣà àwọn jáde láti ṣe àfihàn rẹ̀ fáráyè ni.

    “A sọ ijó di owó, ohun t’ọ́kùnrin ń ṣe l’Èkìtì, obìnrin lè ṣe é”. Ọ̀gbẹ́ni Wale sọ pé Èkìtì Festival ti mú ọlá àti oríire wọ ìlú Èkìtì, “ó ń gbe ọgbọ́n inú àti ìmọ̀ àwọn ọ̀dọ́ jáde síta”.

    Ó tẹ̀síwájú pé gbogbo ìlú tó wà ní Africa ló kù tí Èkìtì máa fìwé pè lọ́dún 2020 láti wá wo ọgbọ́n, ìmọ̀ àti òye ti Ọlọ́run fi sọlọ̀ sí ìlú Èkìtì.

    Lóòtọ́ lóòtọ́, kò sí àṣàdànù nínú àwọ́n afihan ohun agbaṣa ga to waye nibi EKiti Festival 2019.

    Ṣé ẹ mọ̀ pé Ekiti ni ìlú tí Ògún Lákááyé wọlẹ̀ sí?
    Ìlú Ọrúnmìlà náà, Èkìtì ni.

    Èṣù tó má a ń dá àbò bo àwọn èèyàn tirẹ̀, Èṣù Ẹlẹ́gbára tó máa ń gba àwọn eeyan lọ́jọ́ ibi bá dé, ìlú Ekiti ni gbogbo wọn ti wá gẹ́gẹ́ bí adarí àṣà ìpínlẹ̀ náà ṣe sọ ọ́.

    Ìyàwó gómìnà ìpínlẹ̀ Ekiti, Erelú Bísí Fáyemí kádíì ètò àjọ̀dún náà pẹ̀lú ọ̀rọ̀ ìwúrí nípa Ekiti pé “Orin Ekiti dá yàtọ̀, ijó wọn, òkè ńlá ńlá àtàwọn nǹkan tó jẹ́ pé owó làwọn èèyàn fi lọ ń wò wọ́n níbòmíràn”.

    Iroyinowuro

  • Odù kan gorí àtẹ,Ọdẹ́gbèmí Ọdẹ́gbolá11 goróyè Àràbà nílẹ̀ẹ̀bàdàn

    Odù kan gorí àtẹ,Ọdẹ́gbèmí Ọdẹ́gbolá11 goróyè Àràbà nílẹ̀ẹ̀bàdàn

    Fẹ́mi Akínṣọlá

    Erin wo! Àràbà Awo ilẹ̀ Ìbàdàn, Ògbó Awo Oyewusi Amọo Fakayode wọ káàl’ẹ̀ sùn.Ọjọ́ a kú là á dère,èèyàn ò sunwọ̀n láàyè. Bí àlá ló ń ṣe ọ̀pọ̀lọpọ̀ àwọn ẹni ọ̀rọ̀ kàn nílànà ìṣẹ̀ṣe nígbà tí wọ́n gbọ pé àgbà awo náà tí jawàá lẹ̀.
    Ògbó awo Oyewusi ni Àràbà kẹrìnlélógún nínú ìtàn oyè gbogbo gbòò fún onísẹ̀ṣe nílẹ̀ẹ̀bàdàn.
    Àràbà tí ó gbésẹ̀ yìí,gorí oyè ní ọdún 2013,nígbà tó fàdàgbá ayé rọ̀ ní ọjọ́kejìdínlọ́gbọ̀n oṣù kejìlá ọdún 2019.

    Nínú ọkàn ò jọ̀kan ọ̀rọ̀ tí wọ́n fí ń ròyìn Àgbà awo náà, wọ́n fìwà rere, tíí ṣe ẹ̀sọ́ ọmọnìyàn ròyìn Ògbó awo Oyewusi Amọo nínú ìṣe rẹ̀ ní dúníyàn.
    Olóyè náà ní wọ́n ní kò fẹ́ ìrẹ́jẹ fún ẹnikẹ́ni, kìí sì gbè sẹ́yìn àbòsí, bẹ́ẹ̀ ló kórìíra tẹ̀ǹbẹ̀lẹ̀kun.
    Àgbà awo Fakayode wá ìrẹ́pọ̀ tó gbọngbọ́n láàrin àwọn ìpẹ́ẹ̀rẹ́ àti Ògbó awo nílẹ̀ẹ̀bàdàn àti àwọn ìlú mìíràn tó yíiká, èyí náà ló sì jẹ́ ó rọrùn tí ìdàgbàsókè fi bá ẹgbẹ́ onísẹ̀ṣe lásìkò o tiẹ̀ .
    Ṣé orí tí yóó dádé,inú agogo idẹ ní tií wà, ọrùn tí yóó lèjígbà ìlẹ̀kẹ̀,inú agogo idẹ ní tií wá, ìbàdì tí yóó lo Mọ́sàajì,aṣọ ọba tíí taná yanran yanran inú agogo idẹ náà ní tií wá.

    Bí Àràbà se gbésẹ̀ yìí, àwọn ìgbìmọ onísẹ̀ṣe lápapọ̀ kò fẹ́ kí ìyapa ẹnu wà. Gẹ́gẹ́ bí Ìlànà oyè jíjẹ́ nílẹ̀ẹ̀bàdàn, bí Olóyè kán bá ti gbésẹ̀, kò sí àríyànjiyàn ẹni tó tọ́ tó yẹ ní Ìlànà oyè náà ní yóó gorí àpèrè.
    Ní báyìí, akọ́dá awo tíí ṣe igbákejì Àràbà àná,ni àwọn tèwe tàgbà tí gbárùkù tì fún ìtẹ̀síwájú gbogbo onísẹ̀ṣe lápapọ̀.

    Nígbà tí ìròyìn Òwúrọ̀ pé àgbà awo naa lórí ẹ̀rọ ìbánisọ̀rọ̀ rẹ̀ ,o jẹ́ ó di mímọ̀ pé ní ìgbẹ́sẹ̀ oyè nílẹ̀ẹ̀bàdàn,ohun gbogbo pẹ̀lú ètò ni , bẹ́ẹ̀ ni kò dàrú rárá.
    Ó ní Ìlọsíwájú bá onísẹ̀ṣe nípa pé wọ́n rí ìjọba ìpínlẹ bá sọ̀rọ̀ pẹ̀lú akitiyan Àràbà àná yìí tí o sí di pé wọ́n bèèrè fún
    ìsinmi enu ise ọba “Ìṣẹ̀ṣe day August 20, ọdọọdún.”À mọ̀ Gómìnà àná Abiọla Ajimobi kò fi ọwọ́ sí i,bi o tilẹ̀ jẹ́ pé Ilé ìgbìmọ̀ aṣòfin ìpínlẹ̀ oyo fi ọwọ́ síi nígbà náà.

    Ó ṣọ síwájú pé iṣu atẹnumọ́rọ̀ kìí jóná ní àwọn yóó fi ọ̀rọ̀ náà ṣe, òun sì gbà pé Olódùmarè yóó kàwọn yẹ,níwájú Gómìnà ìpínlẹ̀ Ọ̀yọ́ Onímọ̀ ẹ̀rọ Ṣèyí Mákindé torí pé òun ní àfojúsùn rere fún ìtẹ̀síwájú ìlú àti pé, àfojúsùn rere ní awo mímọ́ gbọdọ̀ ní,ojú òpó náà sì ni òun wà torí pé ọmọ àtàtà kìí borúkọ ẹbí jẹ́,ati pé èèyàn tó bá tí lórúkọ rere,kii wá àlàjẹ́ burúkú kún un.
    Akọ́dá,Àgbàawo,Oloye Ifalere Ọdẹ́gbèmí Ọdẹ́gbolá11 ni Àràbà Ìbàdàn karùndínlọ́gbọ̀n (25). Òun tún fẹ́ẹ́ ẹ̀ ni Àràbà tó kéré jùlọ lọ́jọ́ orí tí ó fi dé ipò yí .

    A bíi ní ọjọ́ kẹfà , oṣù kẹfà ọdún 1960. Ó bẹ̀rẹ̀ àkàsọ̀ oyè awo lọ́dún 1992, ó sì sún kẹ̀rẹ̀ kẹ̀rẹ̀ láti ọdún náà kí ó tó di Àràbà ní ọjọ́kejìdínlọ́gbọ̀n oṣù Kọkànlá ọdún 2019.Èyí fihàn pé ìrìn àjò náà gbà á ní ọdún mẹ́tàdínlọ́gbọ̀n kó tó goróyè.
    Ìgbà yí ló sì di ọgbọ̀n ọdún àti oṣù mẹ́wàá tí bàbá a rẹ̀, Àgbà Oyè Ọdẹ́wùmì Àlàó Ọdẹ́gbolá1 fi ipò náà sílẹ̀ .

    Bẹ́ẹ̀ Àràbà mẹ́ta lẹ́yìn ikú Ọdẹ́gbolá akọ́kọ́ ti jẹ ,kí ó tó padà kan Ọdẹ́gbọ́lá kejì.(11) .
    Ìròyìn Òwúrọ̀ kí Àràbà awo náà pé àṣeyè ní àdáwọ́lé wọn gbogbo yóó jẹ́ ó.

    iroyinowuro

  • Ààrẹ Buhari ní ààbò wà fún ẹ̀mí ààrẹ́ àná, Goodluck Jonathan

    Ààrẹ Buhari ní ààbò wà fún ẹ̀mí ààrẹ́ àná, Goodluck Jonathan

    Ààrẹ Buhari ti pe Ààrẹ àná, Goodluck Jonathan lórí ẹ̀rọ ìbánisọ̀rọ̀,láti báa kẹ́dùn lórí ìkọlù àwọn agbébọn tó wáyé ní Òtuòkè tíí ṣe ìlú abínibí rẹ̀ nípìńlẹ̀ Bayelsa.

    Nínú ọ̀rọ̀ orí fóònù náà, Ààrẹ Buhari kò fi bí ìṣẹ̀lẹ̀ náà ṣe ba òun nínú jẹ́ pamọ́. Ó ṣàkàwé rẹ̀ gẹ́gẹ́ bí ìṣẹ̀lẹ̀ ìbànújẹ́ ńlá tí ó sì kù díẹ̀ káátò.

    Ààrẹ tún kan sárá sáwọn ṣọ́jà tó ń ṣọ́ Ilé Ààrẹ Jonathan fún bí wọ́n ṣe kojú ìjà náà gẹ́gẹ́ bí akin. Ó wá bá àwọn ẹbí ọmọ ogun tó ṣubú lójú ìjà náà dárò.

    Ààrẹ Buhari wá fi dá àwọn ọmọ orílẹ̀èdè Nàìjíríà lójú pé àbò tó yẹ ń bẹ fún ẹ̀mí Ààrẹ àná náà àti gbogbo àwọn ọmọ orílẹ̀èdè Nàìjíríà láì yọ ẹni kan sílẹ̀ àti pé ààbò ni yóó túbọ̀ máa jẹ ìṣèjọba òun lógún.

    Ni Ọjọ́ Ìṣẹ́gun ni ìròyìn jáde síta pé àwọn agbébọn kan kọlu ilu Otuoke tó jẹ́ ìlú Ààrẹ àná, Ọ Omọ̀wé Goodluck Jonathan tí wọ́n sì pa ṣọ́jà kan níbẹ̀.

    Fẹ́mi Akínṣọlá

    #iroyinowuro

  • Ìjà ìgboro bé̩ sìlè̩ lórí Sowore

    Ogbeni Omoyele Sowore to je aja-fun-eto- omoniyan to tun je oludije du ipo Aare ni odun yi ni o ti wa ni ahamo awon agbofinro lati bii osu meta seyin.
    Ile-ejo ni ki o maa gba ile wa jejo sugbon ijoba apapo ni okan ohun ko gbee nitori okunrin naa le da ilu ru.


    Ijoba apapo ni ” agbara ko lohun ko ni ile wo, sugbon onile ni ko ni gba fun un”.
    Eyi lo faa ti o si se tun wa ni ahamo awon agbofinro. Awon egbe aja-fun-eto-omoniyan ti won jo wa ko fi igba kan gbagbe re. Gbogbo igba ni iwode woorowo maa n lo ni ilu Abuja ki ijoba apapo le tete mo pe inu awon ko dun si bi Sowore se tun wa ni ahamo won.


    Iwode toni bi omo buruku nigba ti awon Kan naa dede jade pade won pelu Asia pe ti Buhari ni awon n se.
    Ki a to wi ki a to fo awon mejeeji bere si ni tahun si ara won ki o to di pe won bere si ni tawo si ara won, ni eyi ti o mu ki awon kan bii Deji Adeyanju ati awon Kan fara pa die.

  • Àlùfá tọ́ bá ọmọ ọdún méje sùn, wẹ̀wọ̀n ọdún Márùn- ún ní ìpínlẹ̀ Ekiti

    Ọjọ́ gbogbo n t’olè, ọjọ́ kan n t’olóhun.
    Ìjọba ìpínlẹ̀ Ekiti tífìtàn balẹ̀ bí wọ́n ṣe jẹ́ ìpínlẹ̀ àkọ́kọ́ tí yóò bẹ̀rẹ̀ láti máa dárúkọ ọ̀daràn afipá bánilòpọ̀ hàn àti láti máa dójú tì wọ́n.

    Gómìnà ìpínlẹ̀ náà Kayode Fayemi gbé e jáde lójú òpó twitter rẹ̀ pé àsìkò ti tó láti máa fi ojú aṣebi hàn lásìkò tó gbé àwòrán ẹni ọ̀wọ̀ Asateru Gabriel ti ìjọ St Andrew Anglican Ifinsin -Ekiti nígbà kan.

    Gabriel ti fọjú ba ilé ẹjọ ó si jẹ̀bi ẹ̀sùn tí wọ́n fi kan, nítori ìdí èyí yóò maa ṣẹ̀wọ̀n ọdún márùn ní ọgbà ẹ̀wọ̀n Ìjọba ní Ado Ekiti fún ẹ̀sùn ìfipá bá ọmọ ọdún méje lòpọ̀.

    Ní bayiì orúkọ rẹ̀ ti wọ ìwé àkọsílẹ̀ àwọn olùfipábánilòpọ̀ ní ilé ìṣẹ́ ìdajọ́.

    Èyí jẹ́ ìpínlẹ̀ Gúúsù- ìwọ̀ -oòrùn àkọ́kọ́ tí yóò gbé ìgbesẹ̀ yìí.

    Fẹ́mi Akínṣọlá
    Iroyinowuro

  • Ìdí tí a fi yọ Donald Trump nípò Ààrẹ

    Alágbára ayé,alágbára ayé,a sè a ṣẹ̀ má lù kan, Ọlọ́run o tíì da sí dúníyàn .Bí nǹkan se n lọ yìí, Donald Trump ni Ààrẹ orílẹ̀èdè Amẹ́ríkà kẹta nínú ìtàn tí ọ̀bẹ yóó bá ń dìí láti ọ̀dọ̀ àwọn Ilé aṣojú-ṣòfin lórílẹ̀-èdè náà.

    Ìgbésẹ̀ yìí ti wá sọ ọ́ di kannakánná na ọmọ ẹ̀gà bayii nígbà tí ìjíròrò láti buwọ́lu ìyọnípò náà bá wáyé ní Ilé aṣòfin àgbà níbẹ̀.

    Ẹ̀sùn méjì tó dá lórí àsìlò ipo, ati ṣiṣe idiwo fún iṣẹ́ Ilé aṣòfin-ni wọ́n fi kan Ààrẹ Donald Trump .

    Ìdìbò lórí ẹ̀sùn méjì yìí kò ṣàì bá Ìlànà ẹgbẹ́ òsèlú lọ.

    Gbogbo àwọn ọmọ ẹgbẹ́ òsèlú Democrats yàtọ̀ sí méjì ló dìbò fún yíyọ Trump nípò, bẹ́ẹ̀ ni àwọn Republicans tó jẹ́ ẹgbẹ́ òsèlú Trump dìbò takò ó.

    Wákàtí mẹ́wàá gbáko ni ìjíròrò lórí ọ̀nà tí Ìlànà ìyọnípò náà yóó gbà fi wáyé láàrin àwọn aṣòfin àgbà náà ní Amẹ́ríkà.

    Ní nǹkan bíi agogo méjì àbọ̀ òru òní tó jẹ́ agogo mẹ́jọ ààbọ̀ alẹ́ lórílẹ̀-èdè Amẹ́ríkà ni wọn buwọ́ lu ìdìbò náà.

    Ẹ̀sùn àsìlò ipò tí wọ́n fi kan Ààrẹ Trump dá lórí ẹ̀sùn pé ó gbìyànjú àti fún orílẹ̀èdè Ukraine lókùn lọ́rùn kí ó leè kéde ìwádìí ọ̀kan lára àwọn alátakò rẹ̀ lẹ́gbẹ́ òsèlú Democrats, alàgbà Joe Biden.

    Ẹ̀sùn kejì tó kọ́ Trump lẹ́sẹ̀ ni pé ó dí Ilé aṣòfin lọ́wọ́ iṣẹ́ nípa kíkùnà láti fọwọ́ sowọ́pọ̀ pẹ̀lú ilé náà lórí ètò ìwádìí àti yọ Àrẹ náà nípò pẹ̀lú pípàṣẹ pé kí àwọn má ṣe fara hàn jẹ́rì í níwájú Ilé náà.

    Igba ó lé ọgbọ̀n, 230 àwọn aṣòfin ló dìbò kí wọ́n yọ ọ́ lórí ẹ̀sùn àsìlò ipò tí àwọn mẹ́tàdínnígba, 197 sì ta kò ó.

    Igba ó lé mọ́kàndínlọ́gbọ̀n ló dìbò fún ẹ yọ Trump lábẹ́ ẹ̀sùn pé ó dí Ilé aṣòfin lọ́wọ́ tí àwọn méjìdínnígba sì ta kò ó.

    Pẹ̀lú ìyọnikúrò nípò rẹ̀ yìí, Donal trump ti di ṣàwáwù kan náà pẹ̀lú àwọn Ààrẹ méjì mìíràn tó ti jẹ rí nílẹ̀ Amẹ́ríkà nínú ìtàn orílẹ̀èdè ọ̀hún-Andrew Johnson àti Bill Clinton. Èyí ti fa ìjíròrò àti ìgbẹ́jọ́ gbogbo di iwájú àwọn aṣòfin àgbà lórílẹ̀-èdè náà láti mọ̀ bóyá lóòótọ́, Trump yóó fi ipò sílẹ

    Fẹ́mi Akínṣọlá

    Iroyin Owuro

  • Kò sí ilé tàbí só̩ò̩bù tí a kò le fo̩ láti ké̩rù òfin – Àjo̩ Customs

    Awon ajo asobode ile Nigeria ti gbogbo eniyan mo si Customs ni won n ba awon oniroyin soro ni ipinle Adamawa pe, ko si ile tabi soobu ti awon ko le ja tabi fo ti o ba ye.
    Won ni gbogbo eda tabi onisowo fayawo ti awon ba kefin pe o keru wole lona aito ni awon le fagidi ja ile tabi soobu re ki awon si lo awon ero ofin naa lo.


    Gege bi iko ti Ogbeni Kamarudeen Olumon dari ni ipinle Adamawa se salaye. O ni bi awon se n ge awon onifayawo lowo ni won n bo oruko.
    O ni gbogbo ogbon alumokoroyi ni won mo ti won si fi n koja wole. O ni ofin abala 147 ajo Customs gba awon laaye lai gbase lati ibikankan lati lo ko iru oja bee.

    Awon ara oja Mubi ni ipinle naa rawo ebe si ijoba apapo ki o jowo si oju aanu wo awon nitori pe opo onisowo lo dawojo lati lo ra oja ti awon ajo naa gbese le. Won ni awon ko tun je fi iru aso bee seegun mo.
    Awon ajo yii ko gbo ebe rara, gbogbo iresi, ororo ati awon nnkan ile okeere miran ti won ba ninu oja Mubi naa ni won ko.

    Yinka Alabi

  • Èèmọ̀ rè é o !, Ìyàwó àfẹ́sọ́nà kú sínú Kànga, nígbeyàwó kọ̀la

    http://iroyinowuro.com.ng/2019/12/14/eemo-re-e-o-iyawo-afesona-ku-sinu-kanga-nigbeyawo-kola/

    Èèmọ̀ rè é o !, Ìyàwó àfẹ́sọ́nà kú sínú Kànga, nígbeyàwó kọ̀la

    Fẹ́mi Akínṣọlá

    À fi ká kún f’áàdúà kí ọjọ́ ayọ̀ ẹni ó má padà dọjọ́ ìbànújẹ́.Kí èṣù ó sì má ráàyè gbọjọ́ ẹ̀yẹ ẹni . À bí kín ni ká ti pe ti ọ̀dọ́mọbìnrin ọmọ ọdún mérìndínlógún kan, Fatima Abubakar tó pàdánú ẹ̀mí rẹ̀ lẹ́yìn tó ré sínú kànga omi nígbà tí ìgbéyàwó rẹ̀ ku ọ̀la.

    Ìṣẹ̀lẹ̀ náà la gbọ́ pé ó wáyé ní ìlú Gajaja, ìjọba ìbílẹ̀ Danbatta, nìpínlẹ̀ Kano.

    Bàbá Fatima, Ọ̀gbẹ́ni Abubakar sọ fún akọ̀ròyìn pé, ìṣẹ̀lẹ̀ àgbọ́gbárímú náà wáyé lásìkò tí ọmọbìnrin náà àti àwọn ọ̀rẹ́ ẹ rẹ̀ ń lọ fún ayẹyẹ alẹ́ omidan nílé àǹtí rẹ̀ kan l’ọ́jọ́rùú.

    “Ń ṣe ló dúró l’ẹ́gbẹ̀ ẹ́ kànga náà, kó tó di pé ó fi ẹ̀sẹ̀ kọ, tó sì ṣubú sínú kànga.

    Ọjọ́ kejì, tó jẹ́ Ọjọ́bọ ló yẹ kí ayẹyẹ ìgbéyàwó láàrin òun àti ọkọ àfẹ́sọ́nà rẹ̀ ó wáyé.

    Bàbá Fatima ṣàlàyé pé, inú ọmọ òun dùn sí ìgbéyàwó náà, àti pé Ifẹ̀ wà láàrin òun àti ọkọ àfẹ́sọ́nà rẹ̀.

    Ó sọ pé ó ṣeni láànú pé inú ìbànújẹ́ ni àwọn àlejò tó yẹ kó wá bá òun yọ̀ ayọ̀ ìgbéyàwó ọmọ òun wà báyìí.

    Inú ìbànújẹ́ ni ọkọ àfẹ́sọ́nà náà wà, tí kò sì le bá ẹnikẹ́ni sọ̀rọ̀ lórí ẹ̀rọ ìbáraẹnisọ̀rọ̀.